સિટી ન્યૂઝ @ અમદાવાદ

ચોમાસાની ઋતુને ધ્યાનમાં રાખીને અમદાવાદના નવા કલેક્ટર દ્વારા વહીવટી અધિકારીઓ સાથે મહત્વપૂર્ણ પ્રિ-મોન્સૂન સમીક્ષા બેઠક યોજવામાં આવી હતી. આ બેઠકમાં સંભવિત અતિવૃષ્ટિ અને પૂર જેવી કુદરતી આપત્તિઓને પહોંચી વળવા માટે યુદ્ધના ધોરણે આયોજન કરવા કડક આદેશો અપાયા છે. ખાસ કરીને વર્ષોથી જટિલ બનેલી અમદાવાદ-બાવળા હાઈવે પર પાણી ભરાવાની સમસ્યાના કાયમી ઉકેલ માટે ચાલી રહેલી કામગીરીને ઝડપી બનાવવા નિર્દેશ આપવામાં આવ્યો છે. કલેક્ટરે તમામ વિભાગોને 24 કલાક એલર્ટ રહીને લોકો તથા પશુઓની સુરક્ષા સુનિશ્ચિત કરવા તાકીદ કરી છે.

તંત્ર દ્વારા ડિઝાસ્ટર મેનેજમેન્ટ પ્લાનને વધુ મજબૂત બનાવવા માટે નીચાણવાળા વિસ્તારોમાં અગાઉથી જ 'ડી-વોટરિંગ પંપ' ગોઠવવા અને સ્ટ્રોમ વોટર ડ્રેનેજ લાઈનોની સફાઈ પૂર્ણ કરવા સૂચના અપાઈ છે. આ ઉપરાંત, આપત્તિ સમયે બચાવ કામગીરી માટે લાઈફ જેકેટ, બોટ, ગેસ કટર અને આશ્રય સ્થાનો તૈયાર રાખવા પણ જણાવાયું છે. આરોગ્ય વિભાગને ચોમાસા દરમિયાન રોગચાળો ન ફેલાય તે માટે હેલ્થ કંટ્રોલરૂમ શરૂ કરવા તેમજ ક્લોરિન ટેબલેટ અને એન્ટિ-સ્નેક વેનમ જેવી આવશ્યક દવાઓનો પૂરતો જથ્થો રાખવા ખાસ આદેશ આપવામાં આવ્યો છે.

આ સઘન આયોજનમાં માર્ગ અને મકાન વિભાગને રસ્તા-પુલના સમારકામ માટે, તો વીજ કંપનીઓને ટ્રાન્સફોર્મર ઊંચા સ્થળે ખસેડવા માટે નિર્દેશ અપાયા છે. વહીવટી તંત્રે પોલીસ, હોમગાર્ડ, એસ.ટી. અને પશુપાલન વિભાગને પણ પૂરની સ્થિતિમાં સ્ટેન્ડબાય રહેવા સૂચના આપી છે. જોકે, દર વર્ષે આવા આદેશો અને બેઠકોનો દોર ચાલતો હોય છે, ત્યારે આ વખતે નવા કલેક્ટરના કડક આદેશોનું અધિકારીઓ કેટલું પાલન કરે છે અને જનતાને દર વર્ષે ભોગવવી પડતી હાલાકીમાંથી કેટલી રાહત મળે છે, તે જોવું રહ્યું.

વહીવટી તંત્રની પૂર્વ તૈયારીઓ

કોઈપણ કુદરતી આપત્તિ સમયે વહીવટી તંત્રની ત્વરિત કામગીરી જાન-માલનું નુકસાન ઘટાડવામાં મહત્વની ભૂમિકા ભજવે છે. કલેક્ટર દ્વારા લેવાયેલા આ નિર્ણયો અને આપેલી સૂચનાઓ જો ગ્રાઉન્ડ લેવલ પર સંપૂર્ણ રીતે અમલમાં આવે, તો ચોમાસા દરમિયાન નાગરિકોની મુશ્કેલીઓ ચોક્કસપણે ઓછી થઈ શકે છે. વિભાગો વચ્ચેનો યોગ્ય સંકલન અને કંટ્રોલરૂમની 24-કલાકની કાર્યક્ષમતા જ આ વખતે પ્રિ-મોન્સૂન આયોજનની ખરી સફળતા નક્કી કરશે.