એરફોર્સમાં નોકરી અપાવવાના બહાને ઠગાઈ, પ્રોફેસરે ફોન સ્વીચ ઓફ કરી માર્યો હાથો

સ્ટેટ લેવલ ક્રિકેટ અને એરફોર્સમાં સિલેક્શનનું સપનું બતાવ્યું મોંઘું, 1.29 લાખની ઠગાઈ

'ઓફિશિયલ મેઈલ આવશે' કહી પ્રોફેસર થયો ગાયબ, શિક્ષણ જગત શર્મસાર

સિટી ન્યૂઝ @ અમદાવાદ

અમદાવાદની જાણીતી ગુજરાત કોલેજના રમતગમત વિભાગમાં આસિસ્ટન્ટ પ્રોફેસર તરીકે ફરજ બજાવતા પ્રજ્ઞેશ બારહાટ દ્વારા વિદ્યાર્થીઓ સાથે ઠગાઈ કરવામાં આવી હોવાની ઘટના પ્રકાશમાં આવતા ચકચાર મચી ગઈ છે. પ્રોફેસરે વિદ્યાર્થીઓને એરફોર્સમાં નોકરી અપાવવાની અને સ્ટેટ લેવલ ક્રિકેટ ટીમમાં પસંદગી કરાવી આપવાની લાલચ આપીને લાખો રૂપિયા ખંખેરી લીધા હતા. છેતરાયેલા વિદ્યાર્થીએ આ અંગે એલિસબ્રિજ પોલીસ સ્ટેશનમાં ફરિયાદ નોંધાવતા પોલીસે ગુનો દાખલ કરી તપાસ શરૂ કરી છે.

સાણંદના રહેવાસી અને ગુજરાત કોલેજમાં અભ્યાસ કરતા પ્રતીક મિશ્રા જ્યારે વોલીબોલ પ્રેક્ટિસ કરતા હતા, ત્યારે પ્રોફેસર તેમની જાળમાં ફસાયા હતા. શરૂઆતમાં 15,000 રૂપિયામાં એરફોર્સમાં નોકરીની ઓફર આપી હતી, પરંતુ બાદમાં 45,500 રૂપિયામાં સ્ટેટ લેવલ ક્રિકેટમાં સિલેક્શનની નવી વાર્તા બનાવી હતી. પ્રતીકે પોતાના અને મિત્રના સિલેક્શન માટે પ્રોફેસરને કુલ 99,000 રૂપિયા ટ્રાન્સફર કર્યા હતા. પૈસા લીધા બાદ પ્રોફેસરે ઓફિશિયલ ઈમેલ આવશે તેવી ખાતરી આપી હતી, પરંતુ લાંબા સમય સુધી સંપર્ક ન થતા અને ફોન સ્વીચ ઓફ આવતા વિદ્યાર્થીઓને ઠગાઈની જાણ થઈ હતી.

તપાસ દરમિયાન વધુ બે વિદ્યાર્થીઓ પણ આ જ પ્રોફેસરના ભોગ બન્યા હોવાનું સામે આવ્યું છે, જેમને એરફોર્સની નોકરીના બહાને 15-15 હજાર રૂપિયાનો ચૂનો ચોપડવામાં આવ્યો હતો. આ રીતે કુલ 1.29 લાખ રૂપિયાની છેતરપિંડી કરનાર પ્રોફેસર અત્યારે ફરાર છે. પોલીસે આ મામલે સઘન તપાસ હાથ ધરી છે, જેથી આ ઠગ પ્રોફેસરે બીજા કેટલા વિદ્યાર્થીઓને આવી જ રીતે ફસાવ્યા છે તે અંગે સ્પષ્ટતા થઈ શકે.

શિક્ષણ જગત પર કલંક

શિક્ષક એ વિદ્યાર્થીઓ માટે માર્ગદર્શક હોય છે, પરંતુ જ્યારે પ્રોફેસર પોતે જ છેતરપિંડી પર ઉતરી આવે ત્યારે તે આખા શિક્ષણ જગત માટે શરમજનક સ્થિતિ છે. વિદ્યાર્થીઓના સપના અને ભાવિ સાથે રમત રમનાર આવા તત્વો સામે કાયદાકીય કાર્યવાહી થવી અત્યંત આવશ્યક છે. વિદ્યાર્થીઓએ આવી લાલચમાં આવવાને બદલે હંમેશા અધિકૃત ભરતી પ્રક્રિયાઓ પર જ વિશ્વાસ રાખવો જોઈએ તેવી આ ઘટના ચેતવણીરૂપ છે.