સિટી ન્યુઝ @ નવી દિલ્હી

શુક્રવારે વૈશ્વિક બજારોના નબળા સંકેતો વચ્ચે ભારતીય શેરબજારમાં મોટો કડાકો બોલ્યો હતો. સેન્સેક્સ ૭૪૦થી વધુ પોઈન્ટ ગગડીને ૭૪,૧૬૦ પર, જ્યારે નિફ્ટી ૨૫૦ પોઈન્ટના ઘટાડા સાથે ૨૩,૨૩૧ પર પહોંચ્યો હતો. આ ભારે ઘટાડાને કારણે રોકાણકારોના શરૂઆતની ૫ મિનિટમાં જ આશરે ૬ લાખ કરોડ રૂપિયા સ્વાહા થઈ ગયા હતા અને બીએસઈ પર લિસ્ટેડ કંપનીઓનું કુલ માર્કેટ કેપિટલાઇઝેશન ઘટીને આશરે ૪૭૮ લાખ કરોડ રૂપિયા થઈ ગયું હતું.

બજારમાં આવેલા આ અચાનક વેચવાલીના દબાણ પાછળ ક્રૂડ ઓઈલના ભાવમાં થયેલો મોટો ઉછાળો મુખ્ય કારણ છે. મિડલ ઈસ્ટમાં અમેરિકા અને ઈરાન તથા યમનના હૂથી વિદ્રોહીઓ વચ્ચે સંઘર્ષ વધુ તીવ્ર બનતા બ્રેન્ટ ક્રૂડ ઓઈલની કિંમત વધીને પ્રતિ બેરલ ૧૦૯ ડૉલરને પાર પહોંચી ગઈ છે, જેનાથી વૈશ્વિક સ્તરે મોંઘવારી વધવાની દહેશત ઊભી થઈ છે અને ભારતના જીડીપી ગ્રોથ પર તેની અસર પડી શકે છે.

આ ઉપરાંત અમેરિકામાં વધતી મોંઘવારી અને દેવાને કારણે યુએસ ૧૦-વર્ષીય બોન્ડ યીલ્ડ વધીને ૪.૯૮ ટકા પર પહોંચી ગઈ છે, જે ૫ ટકાની મહત્ત્વની સપાટીની નજીક છે. આ વધારાને કારણે વિદેશી રોકાણકારો ભારતીય બજારમાંથી નાણાં પાછા ખેંચી શકે છે. યુએસ ફેડરલ રિઝર્વ દ્વારા વ્યાજદરમાં વધારો કરવાની શક્યતાએ પણ બજારની ચિંતામાં વધારો કર્યો છે.

યુએસ-ઈરાન યુદ્ધ સતત વકરી રહ્યું છે અને હૂથી વિદ્રોહીઓ દ્વારા યમનના પોર્ટ પર કબજો જમાવાતા ઓઈલ સપ્લાય શિપમેન્ટ પ્રભાવિત થવાનો ડર વધી ગયો છે. આ મુખ્ય કારણો ઉપરાંત પ્રાઇમરી માર્કેટમાં આઈપીઓ તરફ નાણું વળવાથી સેકન્ડરી માર્કેટ પ્રભાવિત થયું છે અને યુએસ ડૉલર સામે ભારતીય રૂપિયો પણ ૨૭ પૈસા ઘટીને ૯૫.૭૯ ના સ્તરે પહોંચી ગયો છે.

વિદેશી સંસ્થાગત રોકાણકારો (FII) દ્વારા પણ જબરદસ્ત વેચાણ કરવામાં આવી રહ્યું છે, જેના કારણે બજાર પરનું દબાણ સતત વધી રહ્યું છે. મિડકેપ અને સ્મોલકેપ ઇન્ડેક્સમાં પણ દોઢ ટકા સુધીનો ઘટાડો નોંધાયો છે, જેણે રોકાણકારોની ચિંતાઓને વધુ ઘેરી બનાવી દીધી છે.

બજારમાં કડાકો અને આર્થિક અસર

ભારતીય શેરબજારમાં સર્જાયેલી આ મંદીએ વૈશ્વિક ઘટનાઓ અને સ્થાનિક બજાર વચ્ચેના સીધા જોડાણને ફરી એકવાર ઉજાગર કર્યું છે. ક્રૂડ ઓઈલના ભડકે બળતા ભાવ અને ભૌગોલિક તણાવને કારણે રોકાણકારોની સંપત્તિમાં મોટો ઘટાડો થયો છે, જે આગામી દિવસોમાં આર્થિક નીતિઓ અને બજારની ચાલ પર ઊંડી અસર છોડી શકે છે.