સિટી ન્યુઝ @ સુરેન્દ્રનગર

સુરેન્દ્રનગર શહેરમાં પ્રાચીન દેવવાણી સંસ્કૃત ભાષા પ્રત્યે જાગૃતિ કેળવવા અને તેના સંવર્ધન અર્થે શિક્ષણ વિભાગ તેમજ ગુજરાત રાજ્ય સંસ્કૃત બોર્ડના સંયુક્ત ઉપક્રમે 'સંસ્કૃત સપ્તાહ' ની ઉજવણીના ભાગરૂપે ભવ્ય 'સંસ્કૃત ગૌરવ યાત્રા' નું આયોજન કરવામાં આવ્યું હતું. જિલ્લા કલેક્ટર જી.એચ. સોલંકીના હસ્તે શાસ્ત્રોક્ત વૈદિક મંત્રોચ્ચાર સાથે શ્રી અલ્ટ્રાવિઝન શાળા ખાતેથી આ યાત્રાનો વિધિવત શુભારંભ કરાવવામાં આવ્યો હતો. શહેરના મુખ્ય માર્ગો પર પરિભ્રમણ કરીને આ યાત્રા શ્રી એસ.એન. વિદ્યાલય ખાતે સંપન્ન થઈ હતી, જેમાં શાળા-કોલેજના વિદ્યાર્થીઓ, શિક્ષકો અને સંસ્કૃતપ્રેમીઓ વિશાળ સંખ્યામાં ઉત્સાહભેર જોડાયા હતા.

કાર્યક્રમ દરમિયાન સંબોધન કરતાં જિલ્લા કલેક્ટર જી.એચ. સોલંકીએ જણાવ્યું હતું કે આપણી પ્રાચીન ગુરુકુળ પરંપરાનું જતન કરવું એ સરકારનો મુખ્ય ઉદ્દેશ્ય છે. ગુજરાતી સહિતની ભારતીય ભાષાઓનું મૂળ સંસ્કૃત ભાષામાં રહેલું છે. આજે જર્મની અને ફ્રાન્સ જેવા વિદેશી દેશોમાં પણ સંસ્કૃત શીખવવામાં આવી રહ્યું છે અને કેરળનું એક આખું ગામ સંસ્કૃતમાં સંવાદ કરે છે, ત્યારે આપણે પણ રોજબરોજના વ્યવહારમાં આ પવિત્ર ભાષાનો ઉપયોગ વધારવો જોઈએ.

આ ગૌરવ યાત્રા દરમિયાન વિદ્યાર્થીઓ દ્વારા સંસ્કૃત ગીતો, પવિત્ર સુભાષિતોનું પઠન અને સંસ્કૃત ગરબા જેવા વિશિષ્ટ સાંસ્કૃતિક કાર્યક્રમો પ્રસ્તુત કરવામાં આવ્યા હતા. ઋષિ-મુનિઓની પૌરાણિક વેશભૂષામાં સજ્જ થઈને આવેલા વિદ્યાર્થીઓએ ભારતની પ્રાચીન જ્ઞાન પરંપરા અને સંસ્કૃતિનો પરિચય કરાવ્યો હતો.

આ ભવ્ય પ્રસંગે વઢવાણના પ્રાંત અધિકારી મેહુલ ભરવાડ, જિલ્લા શિક્ષણાધિકારી અરવિંદ ઓઝા, કે.એન. બારોટ તેમજ માળોદ સ્વામિનારાયણ મંદિરના આનંદપ્રિય સ્વામી ખાસ ઉપસ્થિત રહ્યા હતા. આ ઉપરાંત વિવિધ ગુરુકુળ પરંપરાના ગુરુજનો, સંતો-મહંતો અને અગ્રણી સામાજિક સંસ્થાઓના પ્રતિનિધિઓએ હાજરી આપી કાર્યક્રમની શોભા વધારી હતી.

સુરેન્દ્રનગરમાં ભવ્ય સંસ્કૃત ગૌરવ યાત્રા

સુરેન્દ્રનગરમાં સંસ્કૃત બોર્ડ અને શિક્ષણ વિભાગ દ્વારા ભવ્ય સંસ્કૃત ગૌરવ યાત્રા યોજાઈ હતી. કલેક્ટર જી.એચ. સોલંકીએ યાત્રાનું પ્રસ્થાન કરાવી સંસ્કૃતના સંવર્ધન પર ભાર મૂક્યો હતો. વિદ્યાર્થીઓએ ઋષિ વેશભૂષા, સુભાષિત ગાન અને સંસ્કૃત ગરબા રજૂ કર્યા હતા. યાત્રામાં સંતો અને વહીવટી અધિકારીઓ મોટી સંખ્યામાં ઉપસ્થિત રહ્યા હતા.