સિટી ન્યુઝ @ ગાંધીનગર

ગુજરાતમાં નાગરિકોના આરોગ્યની સુરક્ષાને ધ્યાનમાં રાખીને રાજ્ય સરકારે તમાકુ અને નિકોટીનયુક્ત ગુટખા તેમજ પાન મસાલા પરનો પ્રતિબંધ વધુ એક વર્ષ માટે લંબાવવાનો મહત્વનો નિર્ણય લીધો છે. કમિશનર ઓફ ફૂડ સેફ્ટી દ્વારા જારી કરવામાં આવેલા સત્તાવાર આદેશ અનુસાર, 13 સપ્ટેમ્બર 2026 થી 12 સપ્ટેમ્બર 2027 સુધી રાજ્યભરમાં આવા નુકસાનકારક પદાર્થોના ઉત્પાદન, સંગ્રહ, વિતરણ અને વેચાણ પર સંપૂર્ણ પ્રતિબંધ અમલમાં રહેશે. ગુજરાતમાં વર્ષ 2012 થી આ પ્રતિબંધ સતત લંબાવવામાં આવી રહ્યો છે.

આ વખતે પ્રતિબંધના નિયમોને વધુ કડક બનાવવામાં આવ્યા છે. સરકારે સ્પષ્ટ કર્યું છે કે આ પ્રતિબંધ માત્ર તૈયાર પેકિંગવાળા ગુટખા કે પાન મસાલા પૂરતો મર્યાદિત નથી, પરંતુ અલગ-અલગ સામગ્રી વેચીને તેને મિશ્ર કરી અંતિમ ઉત્પાદન તરીકે ગુટખા તૈયાર કરવાનો પ્રયાસ પણ કાયદાકીય રીતે પ્રતિબંધના દાયરામાં આવશે. આ નિયમનો ભંગ કરનાર વિક્રેતાઓ અને ઉત્પાદકો સામે કડક કાનૂની કાર્યવાહી કરવામાં આવશે.

સરકાર દ્વારા આ નિર્ણય કેન્સર અને અન્ય જીવલેણ રોગોના જોખમોને અનુલક્ષીને લેવાયો છે. ટાટા મેમોરિયલ હોસ્પિટલ અને ટાટા ઇન્સ્ટિટ્યૂટ ઓફ ફન્ડામેન્ટલ રિસર્ચ (TIFR) સહિતના સંશોધનોમાં ગુટખાના સેવનથી મોઢાના કેન્સરનું પ્રમાણ વધતું હોવાની ચેતવણી અપાઈ છે. સાથોસાથ 'ગ્લોબલ એડલ્ટ ટોબેકો સર્વે' (GATS) ના અહેવાલ મુજબ દેશમાં 21% પુખ્તો સ્મોકલેસ તમાકુનો ઉપયોગ કરે છે. જનઆરોગ્ય અને વિવિધ સામાજિક સંસ્થાઓની રજૂઆતોને માન આપીને સરકારે આ પ્રતિબંધની મુદત વધારી છે.

ગુટખા-પાન મસાલા પર પ્રતિબંધ લંબાવાયો

ગુજરાત સરકારે તમાકુ અને નિકોટીનયુક્ત ગુટખા તેમજ પાન મસાલાના ઉત્પાદન, સંગ્રહ અને વેચાણ પરનો પ્રતિબંધ વધુ એક વર્ષ માટે લંબાવીને 12 સપ્ટેમ્બર 2027 સુધી યથાવત રાખ્યો છે. અલગ સામગ્રી વેચી ગુટખા બનાવવાની પદ્ધતિ પર પણ રોક મુકાઈ છે. મોઢાના કેન્સરના જોખમ સામે જનઆરોગ્યની રક્ષા માટે ફૂડ સેફ્ટી વિભાગે આ કડક આદેશ જારી કર્યો છે.