સિટી ન્યુઝ @ મેડ્રિડ 

યુરોપ હાલ એક ભયાનક કુદરતી આફતનો સામનો કરી રહ્યો છે, જ્યાં ફ્રાન્સ અને સ્પેનના જંગલોમાં લાગેલી ભીષણ આગે વિકરાળ સ્વરૂપ ધારણ કર્યું છે. આ દુર્ઘટનાને કારણે ૩ લાખથી વધુ લોકો બેઘર થયા છે, જ્યારે ૨.૫ લાખથી વધુ લોકોને સુરક્ષિત સ્થળે સ્થળાંતરિત કરવામાં આવ્યા છે. પરિસ્થિતિની ગંભીરતાને જોતાં સ્પેને દેશના ઇતિહાસમાં પહેલીવાર ‘નેશનલ વાઇલ્ડફાયર ઇમરજન્સી’ જાહેર કરી છે. આ ભીષણ આગમાં ફ્રાન્સમાં ૯૮,૦00 હેક્ટર અને સ્પેનમાં ૧.૩૦ લાખ હેક્ટર જમીન બળીને ખાખ થઈ ગઈ છે.

ફ્રાન્સમાં સ્થિતિ અત્યંત નાજુક બની છે, ખાસ કરીને બોર્ડેક્સ શહેરની આસપાસ અને દક્ષિણપશ્ચિમના ગિરોન્ડે ક્ષેત્રમાં આગ ઝડપથી પ્રસરી રહી છે. ફ્રાન્સના ગૃહ મંત્રી લોરેન્ટ નુનેઝે જણાવ્યું છે કે પરિસ્થિતિ હજુ પણ કાબૂ બહાર છે. બીજી તરફ, સ્પેનમાં મેડ્રિડ, અવિલા અને પૂર્વીય દરિયાકાંઠાના વેલેન્સિયા નજીક આગે તબાહી મચાવી છે. સ્પેનના પ્રધાનમંત્રી પેડ્રો સાંચેઝે ચેતવણી આપી છે કે આગામી દિવસો વધુ મુશ્કેલ સાબિત થઈ શકે છે. આ ગંભીર સંકટને પહોંચી વળવા યુરોપિયન યુનિયન (EU) ના અન્ય દેશો દ્વારા ફ્રાન્સ અને સ્પેનને વિશેષ વિમાનો અને ફાયર ફાઇટિંગ ક્રૂ મોકલીને મદદ કરવામાં આવી રહી છે.