સિટી ન્યુઝ @ નવી દિલ્હી

 હવે રોબોટ તમને કપડાં પહેરાવે તે માત્ર એક કલ્પના નહીં પરંતુ વાસ્તવિકતા બની રહી છે. સાઉથ કોરિયાની કાઈસ્ટ અને સ્ટેનફોર્ડ યુનિવર્સિટીનાં સંશોધકોએ એક એવી અનોખી ટેકનોલોજી વિકસાવી છે, જેની મદદથી વ્યક્તિ હાથનો ઉપયોગ કર્યા વગર પણ કપડાં પહેરી શકે છે. આ ટેકનોલોજી આધુનિક વિજ્ઞાન ક્ષેત્રે એક ક્રાંતિકારી પગલું સાબિત થઈ રહી છે.આ ટેકનોલોજીમાં કપડાંની અંદર હવાનાં દબાણથી ચાલતી નરમ અને સ્થિતિસ્થાપક વાઈન્સ ફીટ કરવામાં આવી છે. જેવી રીતે વેલ અથવા આઈવીનો છોડ કોઈ પણ દીવાલ કે માળખા પર ઘસડાઈને ઉપર ચડે છે, બિલકુલ તેવી જ રીતે આ રોબોટિક વાઈન્સ માત્ર 10 સેકન્ડમાં કપડાંને શરીર પર સરળતાથી સરકાવીને પહેરાવી દે છે. ખાસ વાત એ છે કે, જો વ્યક્તિ એક જગ્યાએ સ્થિર ઊભી ન રહે તો પણ આ સિસ્ટમ યોગ્ય રીતે કામ કરે છે.

કાઈસ્ટના પ્રોફેસર રિયુ જી-હ્વાને જણાવ્યું હતું કે, આ પ્રણાલી તેની આસપાસનાં વાતાવરણ અને શરીરનાં આકાર મુજબ પોતાની જાતે ઢળી જાય છે. સપાટી ભલે લપસણી હોય, ચીકણી હોય કે ઢાળવાળી હોય, તે કોઈ પણ પરિસ્થિતિમાં કપડાં પહેરાવવાનું કામ સફળતાપૂર્વક કરી શકે છે. વૈજ્ઞાનિકોના મતે આ પ્રયોગથી રોબોટિક્સ ક્ષેત્રે નવા આયામો સર થઈ રહ્યા છે.

આ ટેકનોલોજીનો સૌથી મોટો ઉપયોગ ઈમરજન્સી સેવાઓ, દિવ્યાંગ વ્યક્તિઓ તેમજ શારીરિક રીતે અશક્ત કે વૃદ્ધ લોકોને સ્વાવલંબી બનાવવા અને તેમની દૈનિક મદદ કરવા માટે થઈ શકશે. આ અનોખી શોધથી સમાજના જરૂરિયાતમંદ વર્ગને ખૂબ જ મોટો સહારો મળી રહેશે અને તેઓ આત્મનિર્ભર બની શકશે.

સરકાર અને વૈજ્ઞાનિક સમુદાય આ તકનીકને વ્યાપક સ્તરે ઉપલબ્ધ કરાવવા માટે આગળની રણનીતિ પર કામ કરી રહ્યા છે. ભવિષ્યમાં આ પ્રકારના રોબોટિક વસ્ત્રો તબીબી ક્ષેત્રે અને સામાન્ય લોકોના ઘરોમાં એક મહત્વપૂર્ણ હિસ્સો બની જશે તેવી પ્રબળ સંભાવના વ્યક્ત કરવામાં આવી રહી છે.

અદભુત રોબોટિક ટેકનોલોજીથી માનવ જીવન બનશે સરળ

વૈજ્ઞાનિકોની આ નવીનતમ શોધ માત્ર એક તકનીકી સફળતા નથી, પરંતુ માનવતા માટે એક મોટી ભેટ છે. દૈનિક કાર્યોમાં બીજા પર નિર્ભર રહેતા લોકો હવે આ રોબોટિક સિસ્ટમની મદદથી સ્વતંત્ર જીવન જીવી શકશે, જે ભવિષ્યના સ્માર્ટ અને સધ્ધર સમાજનું નિર્માણ કરશે.