સિટી ન્યુઝ @ નવી દિલ્હી

વિશ્વના સૌથી ધનિક ક્રિકેટ બોર્ડ BCCI (ભારતીય ક્રિકેટ કંટ્રોલ બોર્ડ) અને વિવિધ રાજ્યોના ક્રિકેટ એસોસિએશનોમાં પારદર્શિતા લાવવા માટે સુપ્રીમ કોર્ટ છેલ્લા 12 વર્ષથી કાનૂની લડાઈઓ અને વહીવટી વિવાદો ઉકેલી રહી છે. રાજ્ય ક્રિકેટ સંસ્થાઓમાં સતત ચાલતી આંતરિક જૂથબંધી, સત્તા મેળવવાની ખેંચતાણ અને બંધારણમાં નાના-મોટા સુધારાઓને લઈને અવારનવાર કોર્ટમાં આવતી પિટિશનોથી નારાજ થઈને સુપ્રીમ કોર્ટે મંગળવારે એક ઐતિહાસિક અને અત્યંત મહત્વનો આદેશ આપ્યો છે.

ચીફ જસ્ટિસ સૂર્યકાંત, જસ્ટિસ જોયમાલ્ય બાગચી અને જસ્ટિસ વી. મોહનાની ત્રણ જજોની વિશેષ ખંડપીઠે BCCI તેમજ તેના તમામ સંલગ્ન રાજ્ય ક્રિકેટ એસોસિએશનોને કડક સવાલ કર્યો છે કે તેમને કેન્દ્ર સરકારના 'નેશનલ સ્પોર્ટ્સ ગવર્નન્સ (NSG) એક્ટ, 2025' હેઠળ શા માટે સામેલ ન કરવા જોઈએ? અદાલતે આ સમગ્ર મામલે બોર્ડ અને સંબંધિત પક્ષકારોને પોતાનો સ્પષ્ટ પક્ષ રજૂ કરવાનો આદેશ આપ્યો છે.

સુપ્રીમ કોર્ટના આ સંભવિત નિર્ણયથી ભારતીય ક્રિકેટના સમગ્ર વહીવટી માળખામાં ધરખમ ફેરફારો અને વ્યાપક પારદર્શિતા આવવાની સંભાવના છે. જો BCCI અને રાજ્ય સંસ્થાઓ આ નવા રમત શાસન કાયદા હેઠળ આવી જશે, તો બોર્ડનું દૈનિક કામકાજ, હોદ્દેદારોની ચૂંટણી પ્રક્રિયા અને અબજો રૂપિયાની નાણાકીય લેવડદેવડ સીધી સરકારી અને નિયમનકારી દેખરેખ હેઠળ આવશે. આ સાથે જ સત્તાની સાંઠગાંઠ અને આંતરિક ખેંચતાણના કારણે વારંવાર કોર્ટના દરવાજા ખખડાવવાની પ્રવૃત્તિ પર પણ કાયમી લગામ લાગી શકશે.

BCCI ને નવા સ્પોર્ટ્સ એક્ટ હેઠળ લાવવા SC ની નોટિસ

સુપ્રીમ કોર્ટે રાજ્ય ક્રિકેટ સંસ્થાઓની જૂથબંધી અને સતત ચાલતા કાનૂની વિવાદો સામે લાલ આંખ કરી છે. સીજેઆઈ સૂર્યકાંતની બેન્ચે BCCI અને રાજ્ય મંડળોને 'નેશનલ સ્પોર્ટ્સ ગવર્નન્સ એક્ટ, 2025' હેઠળ શા માટે ન લાવવા તે અંગે પક્ષ રજૂ કરવા આદેશ કર્યો છે. આ નિર્ણયથી બોર્ડના વહીવટ, ચૂંટણી અને નાણાકીય કામકાજમાં મોટી પારદર્શિતા આવી શકે છે.