વાજડીના ત્રણ સર્વે નંબર રહેણાંકમાંથી ઇન્ડસ્ટ્રીયલ ઝોનમાં ફેરવાયા
શહેરી વિભાગને વેગ: રૂડાના ડી.પી.માં ફેરફાર
સિટી ન્યૂઝ@ગાંધીનગર
ગુજરાત સરકારના શહેરી વિકાસ અને શહેરી ગૃહ નિર્માણ વિભાગ દ્વારા રાજકોટ શહેરી વિકાસ સત્તામંડળ (રૂડા) ના ફાઇનલ ડેવલપમેન્ટ પ્લાનમાં એક મહત્વપૂર્ણ ફેરફાર (વેરિએશન) ને મંજૂરી આપતું સત્તાવાર નોટિફિકેશન ૨ જૂન ૨૦૨૬ ના રોજ સચિવાલય, ગાંધીનગર ખાતેથી બહાર પાડવામાં આવ્યું છે. આ નવા આદેશ અનુસાર, રાજકોટ નજીક આવેલા વાજડીવડ ગામની ચોક્કસ જમીનને રહેણાંક હેતુના ઝોનમાંથી દૂર કરીને હવે ઔદ્યોગિક હેતુ માટેના ઝોનમાં ફેરબદલ કરવાનો મોટો નિર્ણય રાજ્ય સરકાર દ્વારા લેવામાં આવ્યો છે.સરકારના જાહેરનામા ક્રમાંકGH/V/૧૦૫ of ૨૦૨૬/UDUHD/AAC/e-file/૧૮/૨૦૨૪/૧૯૩૦/L માં જણાવ્યા મુજબ, અગાઉ
રાજ્ય સરકાર દ્વારા ૨૭ ઓક્ટોબર ૨૦૧૬ ના રોજ નોટિફિકેશન નંબર GH/V/૧૯૨ of ૨૦૧૬/ DVP-૧૩-૨૦૧૬- ૨૨૩૭૦૨-L અન્વયે રાજકોટ શહેરી વિકાસ સત્તામંડળનો ફાઇનલ ડેવલપમેન્ટ પ્લાન મંજૂર કરવામાં આવ્યો હતો. ત્યારબાદ, 'રૂડા' દ્વારા ૪ માર્ચ ૨૦૨૪ ના રોજ પત્ર વ્યવહાર કરીને આ પ્લાનમાં ફેરફાર કરવા માટેની એક દરખાસ્ત સરકારને મોકલવામાં આવી હતી. આ
દરખાસ્ત પર વિચારણા કર્યા બાદ, ગુજરાત નગર રચના અને શહેરી વિકાસ અધિનિયમ, ૧૯૭૬ (૧૯૭૬ નો રાષ્ટ્રપતિ એક્ટ નં. ૨૭) ની કલમ ૧૯(૧) હેઠળ આ પ્રસ્તાવિત ફેરફારોને ૨૭ ફેબ્રુઆરી ૨૦૨૬ ના જાહેરનામા દ્વારા ૭ માર્ચ ૨૦૨૬ ના રોજ ગુજરાત સરકારના અસાધારણ ગેઝેટ ભાગ IV-Bના પાના નંબર ૬૩-૧ થી ૬૩-૨ ઉપર પ્રસિદ્ધ કરવામાં આવ્યા હતા.
આ ફેરફાર અંગે જાહેર જનતા તરફથી કોઈ વાંધા કે સૂચનો હોય તો તે લેખિતમાં સચિવાલય, બ્લોક નંબર ૧૪, ૯મા માળે, ગાંધીનગર ખાતે શહેરી વિકાસ અને શહેરી ગૃહ નિર્માણ વિભાગના અગ્ર સચિવને બે મહિનાની અંદર મોકલવા માટે નોટિસ આપવામાં આવી હતી. આ નિયત સમયગાળા દરમિયાન ગુજરાત સરકારને કોઈ પણ વ્યક્તિ તરફથી કોઈ વાંધો કે સૂચન મળેલ ન હોવાથી, સરકારે આ કાયદાની કલમ ૧૯ હેઠળ
મળેલી સત્તાનો ઉપયોગ કરીને આ વેરિએશનને આખરી મંજૂરી આપી દીધી છે અને આ ફેરફાર નોટિફિકેશનની તારીખથી જ અમલમાં આવી ગયો છે.જાહેરનામાના શિડ્યુલ (પરિશિષ્ટ) માં દર્શાવ્યા મુજબ, વાજડીવડ ગામની રેવન્યુ સર્વે નંબર ૫૬, ૮૬ પૈકી અને ૧૦૦ પૈકી વાળી જમીન જે અગાઉ "રેસિડેન્શિયલ ઝોન" (રહેણાંક ક્ષેત્ર) માટે નિયુક્ત કરવામાં આવી હતી, તેને તે ઝોનમાંથી રદ કરીને હવે આ કાયદાની કલમ ૧૨(૨)(એ) હેઠળ "ઇન્ડસ્ટ્રિયલ ઝોન" (ઔદ્યોગિક ક્ષેત્ર) તરીકે નિયુક્ત કરવામાં આવી છે. આ હુકમ ગુજરાતના રાજ્યપાલના આદેશથી અને તેમના નામે શહેરી વિકાસ વિભાગના ખાસ ફરજ પરના અધિકારી અને હોદ્દાની રૂએ સંયુક્ત સચિવ પ્રકાશ દત્તા દ્વારા બહાર પાડવામાં આવ્યો છે.
