પાટડી: પાટડી-વિરમગામ હાઈવે પર ભોજવા ગામ પાસે આજે બપોરના સમયે ખારાઘોડા-અમદાવાદ રૂટની એસટી બસ અને એક ખાનગી કાર વચ્ચે ભયાનક અકસ્માત સર્જાયો હતો. આ દુર્ઘટનામાં કારનો કચ્ચઘાણ વળી ગયો હતો, જ્યારે મુસાફરોથી ભરેલી એસટી બસ રોડ સાઈડમાં ઉતરી ગઈ હતી. સદભાગ્યે આ અકસ્માતમાં કોઈ મોટી જાનહાનિ થઈ નથી, પરંતુ કેટલાક લોકોને નાની-મોટી ઈજાઓ પહોંચતા સ્થાનિકોની મદદથી તેમને હોસ્પિટલ ખસેડાયા હતા.

પ્રાપ્ત વિગતો અનુસાર, આજે બપોરે અંદાજે 1 વાગ્યાના અરસામાં આ ઘટના બની હતી. હાઈવે પરથી પસાર થઈ રહેલી ખારાઘોડા-અમદાવાદ બસને સામેથી આવતી એક બેફામ ગતિની કારે ટક્કર મારી હતી. પ્રત્યક્ષદર્શીઓના જણાવ્યા મુજબ, કારની ગતિ ખૂબ જ વધારે હોવાથી ચાલકે સ્ટીયરિંગ પરથી કાબૂ ગુમાવ્યો હતો અને બસ સાથે ધડાકાભેર અથડાઈ હતી. ટક્કર એટલી જોરદાર હતી કે કારના આગળના ભાગના ફુરચેફુરચા ઉડી ગયા હતા. અકસ્માતને પગલે બસમાં સવાર મુસાફરોના જીવ તાળવે ચોંટ્યા હતા.

ઘટનાની જાણ થતાં જ આસપાસના ગ્રામજનો અને અન્ય વાહનચાલકો મદદે દોડી આવ્યા હતા. ઈજાગ્રસ્તોને તાત્કાલિક ખાનગી વાહનો તેમજ એમ્બ્યુલન્સ મારફતે નજીકની હોસ્પિટલમાં સારવાર અર્થે ખસેડવામાં આવ્યા હતા. અકસ્માત બાદ હાઈવે પર વાહનોની લાંબી કતારો લાગી ગઈ હતી અને થોડો સમય માટે ટ્રાફિક જામના દ્રશ્યો સર્જાયા હતા.

પોલીસ કાફલો પણ ઘટનાની જાણ થતાં જ તુરંત સ્થળ પર દોડી આવ્યો હતો. પોલીસે ક્રેન બોલાવી અકસ્માતગ્રસ્ત વાહનોને રોડ પરથી દૂર કરી ટ્રાફિક પૂર્વવત કરાવ્યો હતો. પોલીસે બસના ડ્રાઈવર અને અન્ય સાક્ષીઓની પૂછપરછ કરીને અકસ્માત અંગેનો ગુનો દાખલ કરવાની તજવીજ હાથ ધરી છે.

હાઈવે પર સતત વધી રહેલા વાહનો અને ઓવરસ્પીડિંગના કારણે અવારનવાર આવા અકસ્માતો સર્જાતા હોય છે. ભોજવા ગામ પાસે થયેલા આ અકસ્માતમાં સદભાગ્યે એસટી બસ પલટી ન ખાતા એક મોટી હોનારત ટળી હતી. હાલમાં પોલીસે બંને વાહનોના ચાલકો વિરુદ્ધ કાયદેસરની કાર્યવાહી કરવાની તજવીજ હાથ ધરી છે અને હોસ્પિટલમાં સારવાર લઈ રહેલા ઇજાગ્રસ્તોની હાલત સ્થિર હોવાનું જાણવા મળ્યું છે.