સિટી ન્યૂઝ @ ભાવનગર

ભાવનગરના નવાપરા વિસ્તારમાં આવેલા તબેલા કેમ્પમાં પોલીસે બાતમીના આધારે દરોડો પાડી નશાકારક કોડાઈન ફોસ્ફોટ ઘટક ધરાવતી કફ સિરપની 30 બોટલો ઝડપી પાડી છે. આ કાર્યવાહી નિલમબાગ પોલીસ દ્વારા કરવામાં આવી હતી, જેમાં આરોપી હનીફ સતારભાઈ શાહના મકાનમાંથી પ્લાસ્ટિકના કોથળામાં છુપાવી રાખેલ સિરપનો જથ્થો અને એક મોબાઈલ ફોન મળી કુલ ₹9,752 નો મુદ્દામાલ કબજે કરવામાં આવ્યો છે. આ કફ સિરપનો ઉપયોગ નશા તરીકે કરવામાં આવતો હોવાની વિગતો સામે આવી છે.

પોલીસની પૂછપરછમાં આરોપી હનીફે કબૂલાત કરી હતી કે આ જથ્થો તે અમદાવાદમાં રહેતા ફાઈક ઉર્ફે જોન મૌલાના વહાબભાઈ કુરેશી પાસેથી લાવ્યો હતો. ફાઈક મૂળ ભાવનગરનો વતની હોવાનું પણ તપાસમાં બહાર આવ્યું છે. આરોપીઓ દ્વારા નશાકારક કફ સિરપના વેચાણ માટે આખું નેટવર્ક ચલાવવામાં આવી રહ્યું હોવાની શક્યતા તપાસવામાં આવી રહી છે. ભાવનગરમાં નશાના કારોબારને ડામવા માટે પોલીસે આ એક મોટી સફળતા મેળવી છે.

આ સમગ્ર મામલે નિલમબાગ પોલીસે બંને આરોપીઓ હનીફ શાહ અને ફાઈક કુરેશી સામે એન.ડી.પી.એસ. (NDPS) એક્ટની કલમ 8(સી), 21(સી) અને 29 હેઠળ ગુનો નોંધી કાયદેસરની કાર્યવાહી શરૂ કરી છે. હાલ પોલીસ અમદાવાદથી જથ્થો સપ્લાય કરનાર આરોપીને પકડવા માટેના ચક્રો ગતિમાન કરી રહી છે. આટલી મોટી માત્રામાં કોડાઈન યુક્ત સિરપ મળતા યુવાનોમાં ફેલાતા નશાના દુષણને રોકવા માટે પોલીસ દ્વારા સઘન તપાસના આદેશ આપવામાં આવ્યા છે.

જપ્ત થયેલ મુદ્દામાલ અને ગુનાની વિગત

પોલીસે આરોપીના મકાનમાંથી 30 બોટલ કફ સિરપ જેની કિંમત ₹4,752 છે, તે જપ્ત કરી છે. સાથે જ ₹5,000 નો એક મોબાઈલ ફોન પણ કબજે કરવામાં આવ્યો છે. કુલ ₹9,752 નો મુદ્દામાલ જપ્ત કરી પોલીસે એનડીપીએસ એક્ટ હેઠળ ગંભીર ગુનો નોંધ્યો છે. આ કેસમાં તપાસ આગળ વધારતા અમદાવાદ કનેક્શનના અન્ય શખસોની સંડોવણી હોવાની પણ પોલીસને પ્રબળ આશંકા છે.