સિટી ન્યુઝ @ વડોદરા

વડોદરા શહેરમાં વિનાયક લોજિસ્ટિક્સ દ્વારા સંચાલિત સીટી બસ સેવા આજે સવારે અચાનક બંધ કરી દેવામાં આવતા હજારો મુસાફરો ભારે મુશ્કેલીમાં મુકાયા હતા. ઓફિસે જતા લોકો અને શાળા-કોલેજના વિદ્યાર્થીઓ સવારથી જ બસ સ્ટોપ પર અટવાઈ ગયા હતા. તંત્રના સંકલનના અભાવે શહેરની અંદાજે 160 સીટી બસોના પૈડાં અચાનક થંભી ગયા હતા. ઘટનાની ગંભીરતાને જોતા વડોદરા મહાનગરપાલિકાએ દોડધામ કરીને વિનાયક ટ્રાન્સપોર્ટ સર્વિસના કરારમાં તાત્કાલિક ત્રણ મહિનાનું એક્સટેન્શન મંજૂર કર્યું છે, જેના પગલે સેવા ફરી શરૂ થઈ છે.

સીટી બસ સંચાલક નરેન્દ્રસિંહ રાણાના મતે, કરાર પૂર્ણ થયા બાદ આગોતરી જાણ ન કરવાને કારણે આ સ્થિતિ સર્જાઈ હતી. તેમણે જણાવ્યું હતું કે, કરાર વિના જવાબદારી લેવી શક્ય ન હોવાથી સુરક્ષાના ભાગરૂપે સવારે 5:30 થી 10:30 વાગ્યા સુધી સેવા બંધ રાખવી પડી હતી. પાલિકા તરફથી ટેલિફોનિક જાણ થતા સેવા પુનઃ શરૂ કરવામાં આવી છે. બીજી તરફ, ડેપ્યુટી મ્યુનિસિપલ કમિશનરે પણ સ્વીકાર્યું છે કે પાલિકા અને કંપની વચ્ચે સંકલનનો અભાવ હતો, જેના કારણે નાગરિકોને હાલાકી ભોગવવી પડી છે. ભવિષ્યમાં આવી ઘટના ન બને તેની તકેદારી રાખવાની ખાતરી આપવામાં આવી છે.

વડોદરામાં હાલ 190 બસો કાર્યરત છે, જે શહેરની 250 બસોની જરૂરિયાત સામે ઘણી ઓછી છે. જાહેર પરિવહન વ્યવસ્થા પર પહેલેથી જ દબાણ હોવાથી આવી અચાનક સેવા બંધ થવાની ઘટનાઓએ વહીવટી તંત્રના આયોજન પર ગંભીર સવાલો ઊભા કર્યા છે. મુસાફરોમાં એવી નારાજગી જોવા મળી રહી છે કે આગોતરી જાણ કે વૈકલ્પિક વ્યવસ્થા વગર સેવા કેમ બંધ કરાઈ? પાલિકા હવે નવી ઇલેક્ટ્રિક બસો સંપૂર્ણપણે કાર્યરત થાય ત્યાં સુધી આ સેવા યથાવત રાખશે તેવી જાહેરાત કરી છે.

પરિવહન તંત્રની કફોડી સ્થિતિ

વડોદરામાં જાહેર પરિવહન માટેની જરૂરિયાત અને વાસ્તવિકતા વચ્ચે મોટું અંતર છે. 250 બસોના બદલે માત્ર 190 બસો દોડી રહી છે, જે શહેરના વધતા વ્યાપ સામે અપૂરતી છે. આવી પરિસ્થિતિમાં કરારના મુદ્દે સેવા અચાનક બંધ થવી એ તંત્રની આયોજન શક્તિ પર પ્રશ્ન ચિન્હ મૂકે છે. આગામી સમયમાં નવી ઇલેક્ટ્રિક બસોનો ઉમેરો થાય તે જ એકમાત્ર કાયમી ઉકેલ જણાય છે, ત્યાં સુધી પાલિકાએ કરાર અને સંકલનની પ્રક્રિયામાં વધુ સાવચેતી રાખવી અનિવાર્ય છે.