સિટી ન્યુઝ @ જૂનાગઢ

જૂનાગઢની ઐતિહાસિક ધરોહર ગણાતા નરસિંહ મહેતા સરોવરના બ્યુટીફિકેશન પ્રોજેક્ટ પાછળ 68 કરોડ રૂપિયાનો ખર્ચ કરવા છતાં, હાલ આ પ્રોજેક્ટ વિવાદોના વંટોળમાં ઘેરાયો છે. લોકાર્પણના માંડ એક વર્ષમાં જ સરોવરની સ્થિતિ દયનીય બની ગઈ છે. સ્થાનિક નાગરિકો અને સામાજિક કાર્યકરોનો આક્ષેપ છે કે સરોવરના તળિયાને ઊંડું કરવાને બદલે બહારથી માટી લાવીને અંદર જ પાથરી દેવામાં આવી છે, જેનાથી પાણી સંગ્રહ કરવાની ક્ષમતા ઘટી ગઈ છે અને સરોવર હવે માત્ર એક ખાબોચિયા જેવું દેખાય છે.

આ અણઘડ આયોજનના કારણે ચોમાસા દરમિયાન જલારામ સોસાયટી, પટેલનગર અને ઝાંઝરડા રોડ જેવા નીચાણવાળા વિસ્તારોમાં પૂર આવવાની ભયાનક સ્થિતિ સર્જાવાની ભીતિ સ્થાનિકો વ્યક્ત કરી રહ્યા છે. સામાજિક કાર્યકર રસિક પોપટ અને 'ઓન્લી ઇન્ડિયન' એનજીઓ દ્વારા સરેઆમ ભ્રષ્ટાચારના આક્ષેપ કરવામાં આવ્યા છે. તેમણે જણાવ્યું કે, પ્રોજેક્ટમાં ખોટા બિલ બનાવી નાણાંની સગેવગે કરવામાં આવી છે, જ્યારે ગ્રાઉન્ડ લેવલ પર માત્ર એક જ જેસીબી દ્વારા કામગીરીનો દેખાવ કરવામાં આવે છે. ડ્રિપ ઇરિગેશન સિસ્ટમ પણ બંધ હાલતમાં ધૂળ ખાઈ રહી છે.

સરોવર પરિસરમાં પીવાના પાણી કે નાસ્તાની કોઈ વૈકલ્પિક વ્યવસ્થા નથી, જ્યારે પ્રવાસીઓ પર બહારથી પાણી કે નાસ્તો લાવવાની મનાઈ છે, જે જનતાની મજાક સમાન છે. અસહ્ય દુર્ગંધને કારણે મોર્નિંગ વોક માટે આવતા નાગરિકો પણ પરેશાન છે. પ્રોજેક્ટની ગુણવત્તા પણ નબળી હોવાના પુરાવા તરીકે ચાલવાના ટ્રેક પર પડેલી તિરાડો અને ઉખડેલી લાદીઓ આક્ષેપોને બળ આપી રહી છે. હવે જાગૃત નાગરિકોએ સત્તાધીશો પાસે સમગ્ર પ્રોજેક્ટના હિસાબો જાહેર કરવાની અને ભ્રષ્ટાચારીઓ સામે કડક પગલાં લેવાની માંગ કરી છે, અન્યથા ઉગ્ર આંદોલનની ચીમકી ઉચ્ચારી છે.

પ્રોજેક્ટ સામેના ગંભીર આક્ષેપો નરસિંહ મહેતા સરોવર પ્રોજેક્ટમાં ભ્રષ્ટાચારના મુખ્ય આક્ષેપોમાં સરોવરના તળિયાને ઊંડું ન કરવું, માટીના નામે અંદર જ કાંપ પાથરી દેવો, કુદરતી જળસ્ત્રોતોને પૂરી દેવા અને ખોટા બિલ મૂકીને નાણાં હડપ કરવાના આરોપો સામેલ છે. પ્રોજેક્ટમાં કોઈ નક્કર આયોજનનો અભાવ અને સુવિધાઓમાં કરવામાં આવેલી બેદરકારીથી સ્થાનિક જનતામાં ભારે રોષ છે. તંત્ર દ્વારા તાત્કાલિક માટીનો નિકાલ કરીને સરોવરને પુનઃ ઊંડું કરવામાં નહીં આવે, તો આગામી દિવસોમાં આ મામલો વધુ ગંભીર બને તેવી શક્યતા છે.