• રાજ્યના 220 તાલુકાઓમાં ભારે વરસાદને કારણે અનેક વિસ્તારો સંપર્કવિહોણા બન્યા છે.

• નવસારી, વલસાડ અને સુરતમાં પૂરની સ્થિતિ સર્જાતા હજારો લોકોને સુરક્ષિત ખસેડાયા.

• વિદ્યાર્થીઓની સુરક્ષાને ધ્યાનમાં રાખીને તંત્ર દ્વારા 19 જિલ્લાઓમાં શૈક્ષણિક કાર્ય બંધ રખાયું.

સિટી ન્યુઝ @ અમદાવાદ

ગુજરાતમાં મેઘરાજાએ ધમાકેદાર બેટિંગ કરતા દક્ષિણ અને મધ્ય ગુજરાતને ધમરોળ્યું છે. આજે રાજ્યના 220 તાલુકાઓમાં મેઘ મહેર થઈ છે, જેમાં સૌથી વધુ નવસારીના ચીખલી અને અમદાવાદના ધોળકામાં 18-18 ઈંચ વરસાદ ખાબક્યો છે. ખેરગામ અને મહેમદાબાદમાં 17-17 ઈંચ વરસાદ નોંધાયો છે. ભારે વરસાદને પગલે અનેક શહેરો અને ગામો બેટમાં ફેરવાયા છે અને રોડ પર નદીઓ વહેતી હોય તેવા દ્રશ્યો સર્જાયા છે.

દક્ષિણ ગુજરાતમાં ભારે વરસાદની સૌથી વધુ અસર જોવા મળી રહી છે, જ્યાં અત્યાર સુધીમાં અંદાજે 38 હજાર લોકોનું રેસ્ક્યુ કરવામાં આવ્યું છે. નવસારીમાં 10 હજાર અને વલસાડમાં 12 હજાર લોકોનું સલામત સ્થળે સ્થળાંતર કરાયું છે. પરિસ્થિતિને પહોંચી વળવા NDRF અને SDRFની ટીમો તૈનાત કરવામાં આવી છે તેમજ ઓડિશાથી વધુ 4 ટીમો બોલાવવામાં આવી છે. આ ઉપરાંત આર્મીની 2 કોલમ પણ રાહત અને બચાવ કાર્યમાં જોડાઈ છે.

વિદ્યાર્થીઓની સુરક્ષા અને સલામતીને ધ્યાનમાં રાખીને તંત્ર દ્વારા અમદાવાદ, ગાંધીનગર, સુરત, વલસાડ, મહીસાગર અને નવસારી સહિત કુલ 19 જિલ્લામાં તમામ શૈક્ષણિક સંસ્થાઓ અને કોલેજોમાં રજા જાહેર કરવામાં આવી છે. આ નિર્ણય મુજબ તમામ સરકારી અને ખાનગી શાળાઓમાં શૈક્ષણિક કાર્ય સંપૂર્ણપણે બંધ રાખવામાં આવ્યું છે.

ભારે વરસાદના કારણે અનેક દુર્ઘટનાઓ પણ સર્જાઈ છે. ખેડા-માતર હાઈવે પર મોતીપુરા પાસે એક કાર ગરનાળા પરથી પાણીના પ્રવાહમાં ખાબકતા અમદાવાદના એક જ પરિવારના 4 લોકોના કરૂણ મોત નિપજ્યા છે, જ્યારે બે લોકોને બચાવી લેવાયા છે. મહેમદાવાદમાં પણ 10 ઈંચ વરસાદ ખાબકતા મંદિર અને મુખ્ય બજારો પાણીમાં ડૂબી ગયા છે.

વરસાદની ગંભીર પરિસ્થિતિને ધ્યાને રાખી મુખ્યમંત્રી ભૂપેન્દ્ર પટેલે SEOC ખાતે ઉચ્ચસ્તરીય બેઠક યોજી સમીક્ષા કરી હતી. વડાપ્રધાન નરેન્દ્ર મોદીએ મુખ્યમંત્રી સાથે ટેલિફોનિક વાતચીત કરી સ્થિતિની માહિતી મેળવી હતી અને કેન્દ્ર સરકાર તરફથી તમામ પ્રકારની મદદની પૂરી ખાતરી આપી હતી.

ગુજરાતમાં ભારે વરસાદ અને પૂરની સ્થિતિ ગંભીર

ગુજરાતમાં કુદરતી આફત સામે તંત્ર દ્વારા યુદ્ધના ધોરણે રાહત અને બચાવ કામગીરી ચાલી રહી છે. નાગરિકોને સાવચેત રહેવા અને બિનજરૂરી બહાર ન નીકળવા અપીલ કરાઈ છે.