સિટી ન્યુઝ @ ગાંધીનગર

ગુજરાતમાં મેઘરાજાએ ધમાકેદાર બેટિંગ કરતા રાજ્યના ૨૬૫ તાલુકાઓમાં નોંધપાત્ર વરસાદ વરસ્યો છે. સ્ટેટ ઇમરજન્સી ઓપરેશન સેન્ટર, ગાંધીનગર દ્વારા જાહેર કરવામાં આવેલા છેલ્લા ૨૪ કલાકના આંકડા અનુસાર, ઉત્તર ગુજરાત, સૌરાષ્ટ્ર અને મધ્ય ગુજરાતના વિસ્તારોમાં વરસાદી માહોલ અત્યંત ઉગ્ર બન્યો છે, જેમાં પાટણ જિલ્લાના સાંતલપુર તાલુકામાં સૌથી વધુ ૧૫ ઇંચ (૩૮૧ મિ.મી.) ભારે વરસાદ નોંધાયો છે.

ઉત્તર ગુજરાતના પાટણ અને વાવ-થરાદ જિલ્લાના વિસ્તારોમાં મેઘરાજાએ તોફાની સ્વરૂપ ધારણ કર્યું છે. પાટણના સાંતલપુરમાં ૧૫ ઇંચ અને રાધનપુરમાં ૧૩.૪૬ ઇંચ (૩૪૨ મિ.મી.) વરસાદ નોંધાયો છે. આ ઉપરાંત વાવ-થરાદના ભાભરમાં ૧૧.૩ ઇંચ તથા દિયોદરમાં ૧૦.૮૩ ઇંચ વરસાદ પડ્યો છે. મધ્ય ગુજરાતના ખેડા જિલ્લાના નડિયાદમાં પણ ૧૦.૩૧ ઇંચ અને મહેમદાવાદમાં ૮.૩૯ ઇંચ જેટલો ભારે વરસાદ ખાબક્યો છે.

આ સિવાય બનાસકાંઠાના દાંતીવાડામાં ૭.૦૯ ઇંચ, સુરેન્દ્રનગરના થાનગઢમાં ૭.૦૯ ઇંચ, મોરબીના વાંકાનેરમાં ૬.૯૩ ઇંચ અને સુઈગામમાં ૬.૮૧ ઇંચ વરસાદ નોંધાયો છે. ગાંધીનગરના દહેગામમાં ૫.૭૧ ઇંચ, અમદાવાદ શહેરમાં ૨.૪૪ ઇંચ અને સુરત શહેરમાં ૩.૨૩ ઇંચ વરસાદ નોંધાયો છે. રાજ્યના બાકીના તાલુકાઓમાં ૧ ઇંચથી લઈને ૫ ઇંચ સુધીનો હળવાથી ભારે વરસાદ નોંધાતા અનેક નીચાણવાળા વિસ્તારોમાં પાણી ભરાયાની પરિસ્થિતિ સર્જાઈ છે.

ભારે વરસાદના કારણે અનેક સ્થળોએ માર્ગો પર પાણી ફરી વળ્યા છે અને જનજીવન પ્રભાવિત થયું છે. વહીવટી તંત્ર દ્વારા સ્થિતિ પર સતત નજર રાખવામાં આવી રહી છે.

સાર્વત્રિક વરસાદથી જળસંચય અને કૃષિ ક્ષેત્રને બૂસ્ટ

રાજ્યમાં પડેલા આ સાર્વત્રિક અને ભારે વરસાદને કારણે ભૂગર્ભ જળસ્તરમાં વધારો થશે તેમજ ખેડૂતોના ઉનાળુ અને ચોમાસાના પાકને પૂરતું પાણી મળી રહેશે, જેનાથી કૃષિ ક્ષેત્રને મોટો ફાયદો થશે.