સિટી ન્યુઝ @ અમદાવાદ

NEET પેપર લીક મુદ્દે વડાપ્રધાન આવાસ બહાર રાહુલ ગાંધીના ધરણા બાદ કોંગ્રેસ આક્રમક બની છે. આજે 22 જુલાઈએ સવારે 10 વાગ્યે અમદાવાદમાં રાજીવ ગાંધી ભવને કોંગ્રેસે વિશાળ ધરણા યોજ્યા હતા. આ ધરણા બાદ કોંગ્રેસના કાર્યકરોએ મોટી સંખ્યામાં એકત્ર થઈને એક રેલી કાઢી હતી જેમાં ભારે આક્રોશ જોવા મળ્યો હતો.

રાજીવ ગાંધી ભવનથી રેલી નીકળીને ચાર રસ્તા પાસે પહોંચતા જ પોલીસ અને કોંગ્રેસના કાર્યકરો વચ્ચે ઉગ્ર ઘર્ષણ થયું હતું. વિરોધ પ્રદર્શન દરમિયાન રોષે ભરાયેલા કોંગ્રેસના કાર્યકરો પોલીસની ગાડી પર ચઢી ગયા હતા. સ્થિતિ પર કાબુ મેળવવા અને કાર્યકરોને નીચે ઉતારવા માટે પોલીસે પણ પોતાની ગાડી પર ચઢવું પડ્યું હતું.

પોલીસે વિરોધ કરી રહેલા ધારાસભ્ય અમિત ચાવડા અને ઈમરાન ખેડાવાલા સહિતના નેતાઓની અટકાયત કરવા ભારે જહેમત ઉઠાવવી પડી હતી. પોલીસને નેતાઓની અટકાયત કરવામાં પરસેવો છૂટી ગયો હતો. આખરે 3 બસ ભરીને કોંગ્રેસના કાર્યકર્તાઓની અટકાયત કરવામાં આવી હતી, જેમાં મહિલા કાર્યકરોની પણ પોલીસ દ્વારા બળપૂર્વક અટકાયત કરવામાં આવી હતી.

કોંગ્રેસના ધરણા કાર્યક્રમમાં NEETની પરીક્ષા અગાઉ આત્મહત્યા કરનાર વિદ્યાર્થી કહાનના પિતા પ્રશાંત પટેલ પણ ખાસ પહોંચ્યા હતા. પ્રશાંત પટેલે દુઃખ વ્યક્ત કરતા જણાવ્યું હતું કે મારા દીકરાએ પણ પોતાનો જીવ ગુમાવ્યો છે એટલે હું દિલ્હી વિરોધમાં ગયો હતો અને આજે ન્યાયની માંગ સાથે અમદાવાદ આવ્યો છું.

કોંગ્રેસના પ્રદર્શનના વિરોધમાં ગુજરાત ભાજપે અમદાવાદમાં કોંગ્રેસ કાર્યાલય ખાતે બપોરે 2 વાગ્યે કાઉન્ટર ધરણાંનું આયોજન કર્યું છે. જેમાં ભાજપ પ્રદેશ અધ્યક્ષ જગદીશ વિશ્વકર્મા અને અન્ય આગેવાનો ઉપસ્થિત રહેશે. ભાજપના ધરણાને પગલે કોંગ્રેસ ભવન પાસે 2000 પોલીસકર્મીઓનો કાફલો ખડકી દેવાયો છે અને બેરિકેડિંગ કરીને કાર્યાલયના ગેટ બંધ કરાવ્યા છે.

અમદાવાદમાં નીટ વિવાદે ધારણ કર્યું ઉગ્ર સ્વરૂપ

NEET પેપર લીક અને પરીક્ષામાં થયેલી ગેરરીતિઓના વિરોધમાં અમદાવાદમાં કોંગ્રેસ દ્વારા ઉગ્ર પ્રદર્શન કરવામાં આવ્યું હતું. રેલી દરમિયાન કાર્યકરો અને પોલીસ વચ્ચે ઘર્ષણ થતા વાતાવરણ તંગ બન્યું હતું. આ ઉપરાંત, વિવાદમાં ભોગ બનનાર વિદ્યાર્થી કહાનના પિતાની હાજરીએ આ આંદોલનને વધુ વેગ આપ્યો છે. ભાજપના વળતા પ્રહાર અને કાઉન્ટર ધરણાની જાહેરાત બાદ શહેરમાં કાયદો અને વ્યવસ્થા જાળવવા પોલીસે લોખંડી બંદોબસ્ત ગોઠવ્યો છે.