સિટી ન્યુઝ @ સુરત

સુરતના કતારગામ વિસ્તારમાં ડભોલી ચાર રસ્તા પાસે આવેલી કિસ્મત કોલોનીમાં લગ્નની પ્રથમ વર્ષગાંઠના બીજા જ દિવસે એક નવદંપતીના રહસ્યમય મોતની ઘટના સામે આવતા ભારે ચકચાર મચી ગઈ છે. 23 વર્ષીય અભય કાતરીયા અને તેની 19 વર્ષીય પત્ની દિશાના મૃતદેહો તેમના ઘરમાંથી મળી આવ્યા હતા. અભય ઘરના પંખા સાથે ફાંસો ખાધેલી હાલતમાં મળી આવ્યો હતો, જ્યારે દિશા જમીન પર ચાદર ઓઢેલી મૃત અવસ્થામાં મળી હતી. આ બિહામણું દૃશ્ય અભયના કાકીએ જોતા પરિવારજનો સ્તબ્ધ થઈ ગયા હતા.

મૃતક દંપતીએ એક વર્ષ પહેલાં જ પ્રેમલગ્ન કર્યા હતા. શનિવારે તેમની પ્રથમ મેરેજ એનિવર્સરી હતી, જેની ઉજવણી માટે પરિવાર દ્વારા કેક અને નવા કપડાં પણ લાવવામાં આવ્યા હતા. જોકે, અભયે થાક લાગ્યો હોવાનું જણાવી કેક કાપવાનું રવિવાર પર મુલતવી રાખ્યું હતું, જે તેમના જીવનનો અંતિમ દિવસ સાબિત થયો. અભય લિફ્ટ રીપેરિંગનું કામ કરતો હતો અને દિશા ખાનગી નોકરી કરતી હતી. આ ઘટનાથી બંને પરિવાર પર આભ તૂટી પડ્યું છે.

કતારગામ પોલીસે બંનેના મૃતદેહોને પોસ્ટમોર્ટમ માટે સ્મીમેર હોસ્પિટલ ખસેડી ઊંડાણપૂર્વકની તપાસ હાથ ધરી છે. પ્રાથમિક તપાસમાં પોલીસે દંપતીના મોબાઈલ ફોન કબજે કર્યા છે, જેથી કોઈ પારિવારિક વિવાદ કે માનસિક તણાવ હતો કે કેમ તે જાણી શકાય. દિશાના શરીર પર ઈજાના નિશાન છે કે અન્ય કોઈ કારણસર મોત થયું છે, તે પીએમ રિપોર્ટ બાદ જ સ્પષ્ટ થશે. હાલ પોલીસે અકસ્માત મોતનો ગુનો નોંધીને તમામ પાસાઓની ગંભીરતાથી તપાસ શરૂ કરી છે.

અભય અને દિશાએ એક વર્ષ પહેલા કોર્ટ મેરેજ કર્યા હતા. રવિવારે પરિવારના સભ્યો બહાર ગયા હતા ત્યારે પાછળથી આ ઘટના બની હતી. અભયના કાકીએ રૂમનો દરવાજો ખોલતા પતિ લટકતો અને પત્ની નીચે મૃત મળી આવી હતી. પોલીસ તપાસમાં મોબાઈલ ફોન ડેટા અને પોસ્ટમોર્ટમ રિપોર્ટ સૌથી મહત્વના પુરાવા સાબિત થશે. દિશા માતા-પિતાની એકની એક દીકરી હતી, જેના કારણે પરિવારમાં ગમગીની છવાઈ ગઈ છે.