સિટી ન્યુઝ @ સુરેન્દ્રનગર

સુરેન્દ્રનગરની પ્રતિષ્ઠિત શ્રી એમ.પી. શાહ આર્ટસ એન્ડ સાયન્સ કોલેજ માટે એક ગૌરવપૂર્ણ સિદ્ધિ પ્રાપ્ત થઈ છે. રાજ્યની ઉચ્ચ શિક્ષણ કમિશ્નરની કચેરી અને KCG દ્વારા હાથ ધરવામાં આવેલા મૂલ્યાંકનમાં રાજ્યની 25 આધુનિક અને આદર્શ કોલેજોમાં એમ.પી. શાહ કોલેજની પસંદગી કરવામાં આવી છે. આ સિદ્ધિ બદલ કોલેજ પરિવારમાં ઉત્સાહનો માહોલ જોવા મળી રહ્યો છે. 15 જૂનના રોજ આયોજિત સત્રારંભ બેઠક દરમિયાન આચાર્ય ડો. અમિતકુમાર મિશ્રા દ્વારા આ બાબતની જાહેરાત કરવામાં આવી હતી.

આ બેઠકમાં કોલેજના આચાર્ય ડો. અમિતકુમાર મિશ્રાએ તમામ વિદ્યાર્થીઓ અને સ્ટાફ સભ્યોને નવા શૈક્ષણિક સત્ર માટે હાર્દિક શુભકામનાઓ પાઠવી હતી. બેઠક દરમિયાન તાજેતરમાં કરવામાં આવેલા મહેકમ ફેરફારો અંગે પણ સ્ટાફને વિસ્તૃત માહિતી આપવામાં આવી હતી. આચાર્યએ ભારપૂર્વક જણાવ્યું હતું કે કોલેજમાં તમામ વ્યાખ્યાનો અને અન્ય શૈક્ષણિક પ્રવૃત્તિઓ નિર્ધારિત સમયપત્રક મુજબ જ થાય તે અત્યંત આવશ્યક છે, જેથી વિદ્યાર્થીઓના અભ્યાસમાં કોઈ અવરોધ ન આવે.

સત્રારંભ બેઠકનો મુખ્ય ઉદ્દેશ્ય વિદ્યાર્થીઓને શ્રેષ્ઠ શૈક્ષણિક વાતાવરણ પૂરું પાડવાનો હતો. આચાર્યએ સ્ટાફને વિદ્યાર્થીલક્ષી અભિગમ જાળવી રાખવા માટે માર્ગદર્શન આપ્યું હતું. કોલેજનું લક્ષ્ય માત્ર અભ્યાસક્રમ પૂર્ણ કરવાનું જ નથી, પરંતુ વિદ્યાર્થીઓના સર્વાંગી વિકાસ માટેનું સકારાત્મક માહોલ તૈયાર કરવાનું પણ છે. આદર્શ કોલેજ તરીકે પસંદગી પામ્યા બાદ હવે જવાબદારી વધી હોવાનું જણાવી તંત્રએ આગામી સત્રમાં શૈક્ષણિક પ્રગતિને વધુ ગતિશીલ બનાવવાનો નિર્ધાર વ્યક્ત કર્યો છે.

વિદ્યાર્થીઓના સર્વાંગી વિકાસ પર ભાર આદર્શ કોલેજ તરીકેની પસંદગી કોલેજમાં શૈક્ષણિક સુવિધાઓ અને વહીવટી કાર્યક્ષમતાના ઉચ્ચ ધોરણો દર્શાવે છે. આચાર્ય ડો. અમિતકુમાર મિશ્રાએ સ્ટાફને સૂચના આપી છે કે વિદ્યાર્થીઓના પ્રશ્નોના ઉકેલ માટે હંમેશા તત્પર રહેવું અને તેમની શૈક્ષણિક જરૂરિયાતોને પ્રાથમિકતા આપવી. વિદ્યાર્થીલક્ષી અભિગમ જાળવી રાખવાથી શિક્ષણનું સ્તર ઉંચુ આવશે અને કોલેજ વધુ નવી સિદ્ધિઓ હાંસલ કરી શકશે.