સિટી ન્યુઝ @ સુરેન્દ્રનગર  : સુરેન્દ્રનગર સ્પેશિયલ ઓપરેશન ગ્રુપ (SOG) એ સોશિયલ મીડિયા પર હથિયારનું પ્રદર્શન કરીને ભયનું વાતાવરણ ઊભું કરનારા તત્વો સામે આકરી કાર્યવાહી હાથ ધરી છે. પાટડી તાલુકાના ઝેઝરી ગામના એક શખ્સ દ્વારા સોશિયલ મીડિયા પ્લેટફોર્મ પર હથિયાર સાથેના ફોટા મૂકવામાં આવ્યા હોવાની માહિતી મળતા પોલીસે તેની ધરપકડ કરી છે. આરોપી સલીમખાન અજીતખાન સાયબાણી વિરુદ્ધ બજાણા પોલીસ સ્ટેશનમાં આર્મ્સ એક્ટની વિવિધ કલમો હેઠળ ગુનો નોંધવામાં આવ્યો છે.

રાજકોટ રેન્જના આઈપીએસ અધિકારી નિર્લિપ્ત રાય અને સુરેન્દ્રનગર જિલ્લા પોલીસ અધિક્ષક પ્રેમસુખ ડેલૂના માર્ગદર્શન હેઠળ જિલ્લામાં ગેરકાયદેસર પ્રવૃત્તિઓ અટકાવવાની સૂચનાઓ આપવામાં આવી હતી. આ સૂચનાના અનુસંધાને SOG સ્ટાફના હેડ કોન્સ્ટેબલ અરવિંદસિંહ ઝાલાને બાતમી મળી હતી કે ઝેઝરી ગામનો એક શખ્સ હથિયાર સાથે પ્રદર્શન કરી રહ્યો છે. તપાસ દરમિયાન ૩૪ વર્ષીય સલીમખાનની ઓળખ થઈ હતી, જે વ્યવસાયે ખેતી સાથે સંકળાયેલો છે.

પોલીસ પૂછપરછ દરમિયાન આરોપી સલીમખાને સ્વીકાર્યું હતું કે તેની પાસે હથિયાર રાખવાનો કોઈ કાયદેસરનો પરવાનો નથી. આ કબૂલાતના આધારે પોલીસે તેની વિરુદ્ધ આર્મ્સ એક્ટ હેઠળ કાયદેસરની કાર્યવાહી હાથ ધરી છે. આ સફળ કામગીરીમાં પીઆઈ બી.એચ. શીંગરખીયા અને પીએસઆઈ એન.એ. રાયમા સહિતના અધિકારીઓ અને પોલીસ કર્મચારીઓ જોડાયા હતા. સુરેન્દ્રનગર પોલીસે સ્પષ્ટ કર્યું છે કે સોશિયલ મીડિયા પર હથિયારોનું પ્રદર્શન કરનારાઓ સામે આગામી દિવસોમાં પણ આવી જ કડક ઝુંબેશ ચાલુ રહેશે.