• 2010 પહેલાના શિક્ષકોને પરીક્ષામાંથી મુક્તિ આપવાની માંગ, સરકાર સામે આરપારની લડાઈ
• સુપ્રીમ કોર્ટના નિર્ણયથી ફેલાયો ભારે અસંતોષ, શૈક્ષિક સંઘોએ આંદોલનનું રણશિંગું ફૂંક્યું
• વર્ષ 2010 પહેલા ભરતી થયેલા શિક્ષકોમાં રોષ, પરીક્ષામાંથી મુક્તિ મેળવવા આંદોલન તેજ

સિટી ન્યૂઝ @ ગાંધીનગર

સુપ્રીમ કોર્ટ દ્વારા શિક્ષકો માટે TET (ટીચર્સ એલિજિબિલિટી ટેસ્ટ) ફરજિયાત બનાવતા નિર્ણયના વિરોધમાં ગુજરાતના શિક્ષકોએ હવે આંદોલન તેજ કર્યું છે. રાજ્યભરમાં જિલ્લા કક્ષાએ વિરોધ પ્રદર્શન કર્યા બાદ, હવે ગુજરાત રાજ્ય પ્રાથમિક શિક્ષક સંઘના નેતૃત્વમાં 11 જુલાઈએ ગાંધીનગરના સેક્ટર 6 સ્થિત સત્યાગ્રહ છાવણી ખાતે રાજ્યસ્તરીય ધરણા પ્રદર્શન યોજાશે. આ આંદોલનમાં રાજ્યના વિવિધ જિલ્લાઓમાંથી 30 હજારથી વધુ શિક્ષકો એકત્રિત થઈને સરકાર સમક્ષ પોતાની માંગણીઓ રજૂ કરશે.

શિક્ષકોની મુખ્ય માંગણી એ છે કે, જે શિક્ષકોની ભરતી વર્ષ 2010 પહેલા જે તે સમયના નિયમો મુજબ થઈ હતી, તેમને TET પરીક્ષામાંથી મુક્તિ આપવામાં આવે. શિક્ષકોના મતે, તેઓ લાંબા સમયથી શિક્ષણ સેવા આપી રહ્યા છે, તેથી હવે નવો નિયમ તેમના પર લાગુ કરવો અયોગ્ય છે. અગાઉ 33 જિલ્લાઓમાં શિક્ષકોએ કલેક્ટર કચેરીઓ ખાતે આવેદનપત્ર આપીને પોતાનો વિરોધ નોંધાવ્યો હતો, પરંતુ માંગણીઓ સ્વીકારવામાં ન આવતા હવે આ આંદોલનને ગાંધીનગર સુધી લઈ જવાનો નિર્ણય લેવામાં આવ્યો છે.

સુપ્રીમ કોર્ટે સ્પષ્ટ નિર્દેશ આપ્યો છે કે, જે શિક્ષકોની નોકરીના પાંચ વર્ષથી વધુ સમય બાકી છે, તેમણે TET પાસ કરવી અનિવાર્ય છે, અન્યથા ફરજિયાત નિવૃત્તિ અથવા રાજીનામું આપવાની સ્થિતિ સર્જાઈ શકે છે. આ નિર્ણયથી જૂના શિક્ષકોમાં ભવિષ્યને લઈને ચિંતા અને ભારે રોષ જોવા મળી રહ્યો છે. હવે 11 જુલાઈએ ગાંધીનગરમાં યોજાનારા આ મહાધરણામાં સરકાર શું નિર્ણય લે છે અને આ આંદોલન કઈ દિશા પકડશે તે જોવું ખૂબ જ મહત્વનું બની રહેશે.