• મજેવડી હાઈવે પર બંધ ટ્રકમાં અર્ટિગા કાર ઘૂસી, એક માસૂમ બાળકનો ચમત્કારિક બચાવ
• ટ્રક પાછળ કાર ઘૂસતા 4 ના મોત, 2 ની હાલત ગંભીર: સિવિલ હોસ્પિટલમાં અરેરાટી
• અસ્થિ વિસર્જન માટે જતો પરિવાર અકસ્માતનો ભોગ બન્યો, 4 ના ઘટનાસ્થળે જ મોત

સિટી ન્યુઝ @ જૂનાગઢ

જૂનાગઢના મજેવડી ગામ પાસે ફોર-ટ્રેક હાઈવે પર આજે એક હૃદયદ્રાવક માર્ગ અકસ્માત સર્જાયો છે. બનાસકાંઠાનો એક પરિવાર પોતાના સ્વજનના અસ્થિ વિસર્જન માટે અર્ટિગા કારમાં સવાર થઈને સોમનાથ જઈ રહ્યો હતો, ત્યારે રસ્તામાં એક બંધ ટ્રક પાછળ તેમની કાર ધડાકાભેર અથડાઈ હતી. આ અથડામણ એટલી પ્રચંડ હતી કે કારનો આગળનો ભાગ સંપૂર્ણપણે ક્ષતિગ્રસ્ત થઈ ગયો હતો અને ઘટનાસ્થળે જ 4 સભ્યોના કરુણ મોત નિપજ્યા હતા.

ઘટનાની જાણ થતાં જ આસપાસના લોકો દોડી આવ્યા હતા અને પોલીસ તેમજ ૧૦૮ની ટીમે બચાવ કામગીરી હાથ ધરી હતી. કારમાં સવાર અન્ય 4 લોકોને ગંભીર હાલતમાં જૂનાગઢ સિવિલ હોસ્પિટલ ખસેડવામાં આવ્યા છે, જ્યાં બે વ્યક્તિઓની સ્થિતિ અતિ નાજુક હોવાથી તેમને આઈસીયુ (ICU) માં દાખલ કરવામાં આવ્યા છે. સમગ્ર ઘટનામાં એક માસૂમ બાળકનો ચમત્કારિક રીતે બચાવ થતા તેને હેમખેમ બહાર કાઢવામાં આવ્યો હતો.

હાઈવે પર આ પ્રકારની બેદરકારીના કારણે વારંવાર અકસ્માતો સર્જાય છે. જૂનાગઢ પોલીસની ટીમ ઘટનાસ્થળે પહોંચીને મૃતકોના પોસ્ટમોર્ટમની કાર્યવાહી હાથ ધરી છે. આ ઉપરાંત, હાઈવે પર બંધ હાલતમાં ટ્રક મૂકીને ટ્રાફિક અને સુરક્ષાના નિયમોનું ઉલ્લંઘન કરનાર ટ્રક ચાલકની બેદરકારી સહિતના તમામ પાસાઓ પર પોલીસે તપાસ શરૂ કરી છે. અસ્થિ વિસર્જન માટે નીકળેલા પરિવાર પર આવી પડેલી આ આફતને લઈને સમગ્ર પંથકમાં શોકનું મોજું ફરી વળ્યું છે.