સિટી ન્યૂઝ@ગાંધીનગર

રાજ્ય સરકારના શિક્ષણ વિભાગ દ્વારા શાળાઓમાં રમતગમત અને શારીરિક શિક્ષણને વેગ આપવા માટે એક અત્યંત મહત્વનો ઠરાવ પસાર કરવામાં આવ્યો છે. આ નવા નિર્ણય મુજબ રાજ્યની ૧,૧૪૧ જેટલી શાળાઓમાં વ્યાયામ શિક્ષકો (પીટી ટીચર્સ) ની સીધી ભરતી કરવામાં આવશે. લાંબા સમયથી શાળાઓમાં રમતગમતના શિક્ષકોની જગ્યાઓ ખાલી હોવાના કારણે વિદ્યાર્થીઓના શારીરિક વિકાસ અને રમતગમતની પ્રવૃત્તિઓ પર અસર પડી રહી હતી, જેને ધ્યાને રાખીને સરકારે આ મહત્વપૂર્ણ પગલું ભર્યું છે.

વ્યાયામ શિક્ષકોની આ ભરતી પ્રક્રિયા પારદર્શક અને ગુણવત્તાસભર રહે તે માટે શિક્ષણ વિભાગ દ્વારા ખાસ ધ્યાન આપવામાં આવી રહ્યું છે. શિક્ષકોની શૈક્ષણિક અને શારીરિક લાયકાતના ચોક્કસ માપદંડો શું રાખવા તે અંગે વરિષ્ઠ અધિકારીઓ અને નિષ્ણાતો વચ્ચે વિગતવાર ચર્ચા-વિચારણા કરવામાં આવી રહી છે. રમતગમત ક્ષેત્રે યોગ્ય કૌશલ્ય અને પૂરતી લાયકાત ધરાવતા ઉમેદવારો જ આ ભરતીમાં પસંદ થાય તે પ્રકારે નીતિ-નિયમો ઘડવાની દિશામાં તંત્ર આગળ વધી રહ્યું છે.

ભરતી માટેના તમામ માપદંડો અને શરતોને આખરી ઓપ આપવા માટે આગામી ૨૮ જુલાઈના રોજ એક ખાસ ઉચ્ચ સ્તરીય બેઠકનું આયોજન કરવામાં આવ્યું છે. આ બેઠકમાં શિક્ષણ વિભાગના ઉચ્ચ અધિકારીઓ ઉપસ્થિત રહીને લાયકાતના ધોરણો નક્કી કરશે. ૨૮ જુલાઈની બેઠક બાદ ભરતી પ્રક્રિયાની સત્તાવાર જાહેરાત અને અરજી પ્રક્રિયા અંગેનું નોટિફિકેશન બહાર પાડવામાં આવે તેવી પૂરેપૂરી શક્યતા છે, જેને પગલે વ્યાયામ ક્ષેત્રે કરિયર બનાવવા માંગતા હજારો બેરોજगार ઉમેદવારોમાં આશાનું કિરણ જાગ્યું છે.