• વડાપ્રધાન મોદીની ફ્રાન્સ અને સ્લોવાકિયાની 6 દિવસની સફળ યાત્રા સંપન્ન
• વિવાટેક સમિટમાં મોદીનો દબદબો, ગરીબીમાંથી 25 કરોડ લોકોને બહાર લાવ્યાની કરી જાહેરાત
• 12 વર્ષની વિકાસગાથાનો મોદીએ કર્યો સ્વીકાર, કહ્યું- ભારત હવે નેક્સ્ટ લેવલ પર

સિટી ન્યુઝ @ નવી દિલ્હી

વડાપ્રધાન નરેન્દ્ર મોદી ફ્રાન્સ અને સ્લોવાકિયાની તેમની 6 દિવસની સફળ અને ઐતિહાસિક યાત્રા પૂર્ણ કરીને ગુરુવારે મોડી રાત્રે ભારત પરત ફર્યા છે. આ યાત્રા દરમિયાન પેરિસમાં આયોજિત 'વિવાટેક' (VivaTech) સમિટમાં વડાપ્રધાન મોદીએ ભારતના ટેકનોલોજી ક્ષેત્રના વિકાસને વૈશ્વિક મંચ પર રજૂ કર્યો હતો. ખાસ નોંધપાત્ર બાબત એ રહી કે ફ્રાન્સના રાષ્ટ્રપતિ ઇમેન્યુઅલ મેક્રોને હિન્દીમાં વીડિયો સંદેશ આપીને પીએમ મોદીનું ઉષ્માભર્યું સ્વાગત કર્યું હતું અને ભારત-ફ્રાન્સની મિત્રતાને 'અમર' ગણાવી હતી.

પેરિસમાં ભારતીય સમુદાયને સંબોધતા વડાપ્રધાન મોદીએ પોતાની ૧૨ વર્ષની વિકાસયાત્રા અને દેશની સિદ્ધિઓને આંકડાઓ સાથે વર્ણવી હતી. તેમણે ગૌરવ સાથે જણાવ્યું હતું કે, ભારત આજે વિશ્વનો બીજો સૌથી મોટો મોબાઇલ ઉત્પાદક દેશ બની ગયો છે અને મોબાઈલ મેન્યુફેક્ચરિંગ યુનિટમાં ૧૦૦ ગણો વધારો થયો છે. તેમણે વધુમાં ઉમેર્યું કે છેલ્લા વર્ષોમાં ૨૫ કરોડ લોકોને ગરીબીની રેખામાંથી બહાર લાવવામાં સરકાર સફળ રહી છે અને હાઈવે, એરપોર્ટ તથા શિક્ષણ ક્ષેત્રે ભારતની પ્રગતિની ગતિ બમણી થઈ છે.

પોતાના સંબોધનમાં મોદીએ ભારતીય લોકશાહીની તાકાત પર ભાર મૂકતા કહ્યું હતું કે, "આ લોકશાહીની જ શક્તિ છે કે એક સામાન્ય ચાવાળો આજે અહીં સુધી પહોંચી શક્યો છે." આ યાત્રા દરમિયાન તેમણે G7 સમિટમાં પણ હાજરી આપી હતી, જ્યાં અમેરિકી રાષ્ટ્રપતિ ડોનાલ્ડ ટ્રમ્પ સાથેની મુલાકાત ચર્ચાનો વિષય બની હતી. વડાપ્રધાને આ સંપૂર્ણ પ્રવાસને સહભાગિતા અને ઉપલબ્ધિઓથી પરિપૂર્ણ ગણાવ્યો હતો અને કહ્યું હતું કે હવે ભારતને 'નેક્સ્ટ લેવલ' પર લઈ જવાનો સમય પાકી ગયો છે.

12 વર્ષની વિકાસયાત્રાના મુખ્ય અંશો

વડાપ્રધાન મોદીના ફ્રાન્સ પ્રવાસનું મુખ્ય આકર્ષણ ભારતની બદલાતી તસવીર હતું. ગરીબી નાબૂદી હોય કે ડિજિટલ ક્રાંતિ, વડાપ્રધાને આંકડાકીય માહિતી સાથે ભારતની ક્ષમતા વિશ્વ સામે મૂકી છે. ફ્રાન્સ સાથેના ૧૨ વર્ષના મજબૂત સંબંધો અને આગામી ફેબ્રુઆરીમાં રાષ્ટ્રપતિ મેક્રોનનો પ્રસ્તાવિત ભારત પ્રવાસ બંને દેશો વચ્ચેના વ્યૂહાત્મક સંબંધોને નવી ઊંચાઈઓ પર લઈ જશે તેવું સ્પષ્ટ દેખાઈ રહ્યું છે.