સિટી ન્યુઝ @ રાજકોટ

રાજકોટ સહિત સમગ્ર ગુજરાતભરમાં આજે વેપારીઓ દ્વારા 'NO UPI DAY' પાળવામાં આવી રહ્યો છે, જેના ભાગરૂપે બજારના વેપારીઓએ પોતાની દુકાનોમાં મુકેલા યુપીઆઈ ક્યૂઆર કોડ પર કાળું કપડું ઢાંકીને એક વિશિષ્ટ રીતે પોતાનો ભારે આક્રોશ વ્યક્ત કર્યો છે અને આજે યુપીઆઈ દ્વારા પેમેન્ટ સ્વીકારવાનું સંપૂર્ણપણે બંધ રાખ્યું છે. યુપીઆઈ ટ્રાન્જેક્શન પર વધારાના ચાર્જિસ અને કડક લિમિટ લાદવામાં આવતા વેપારી આલમમાં ભારે રોષ જોવા મળી રહ્યો છે.

આ વિરોધ પ્રદર્શનને રાજકોટ ચેમ્બર ઓફ કોમર્સ દ્વારા પણ સંપૂર્ણ સમર્થન આપવામાં આવ્યું છે, અને ટેક્સટાઈલ એસોસિએશન સહિતના વિવિધ સસોસિએશનો દ્વારા આજે નો યુપીઆઈ ડે ઉજવાયો હતો. ધર્મેન્દ્ર રોડ, ઘીકાંટા રોડ, પેલેસ રોડ તેમજ પરા બજાર સહિત રાજકોટની તમામ મુખ્ય બજારોમાં આજે સવારથી જ આ વિરોધની વ્યાપક અસર જોવા મળી છે, કારણ કે સામાન્ય રીતે બજારના કુલ વેપારમાં 60%થી 70% પેમેન્ટ્સ ડિજિટલ માધ્યમથી થતા હોય છે.

વેપારીઓ દ્વારા આજરોજ યુપીઆઈ પેમેન્ટ નહીં સ્વીકારવામાં આવતા કરોડો રૂપિયાના નાણાકીય વ્યવહારો અટકી પડ્યા છે, જેના કારણે બજારના વેપાર પર મોટી અસર પડી છે અને ગ્રાહકોને પણ ફરજિયાતપણે રોકડમાં વ્યવહાર કરવાની અગવડતા વેઠવી પડી રહી છે. દિવ્યભાસ્કર સાથેની વાતચીતમાં રાજકોટ ટેક્સટાઈલ એસોસિએશનના પ્રમુખ હિતેશ અનડકટે જણાવ્યું હતું કે રાજકોટના તમામ મુખ્ય એસોસિએશનો આ વિરોધમાં જોડાયા છે.

તેમણે ઉમેર્યું હતું કે ઓનલાઈન પેમેન્ટ અને ટ્રાન્જેક્શન પર જે નવા MDR ચાર્જિસ લાદવામાં આવ્યા છે તે તાત્કાલિક ધોરણે નાબૂદ કરવામાં આવે. આ ઉપરાંત દરરોજના 2,000 રૂપિયાના ટ્રાન્જેક્શન પરની મર્યાદા અને ટેક્સ દૂર કરી લિમિટ વધારવામાં આવે તથા માસિક 1,00,000 રૂપિયા સુધી ટ્રાન્જેક્શનની મર્યાદામાં પણ યોગ્ય વધારો કરવામાં આવે તેવી સ્પષ્ટ માંગ છે.

આ નવા ચાર્જિસનો બોજ નાના અને મોટા તમામ વેપારીઓ પર પડી રહ્યો છે, જેનાથી વેપારી વર્ગ ભારે હેરાનગતિ ભોગવી રહ્યો છે. જો સરકાર અને સંબંધિત સત્તાવાળાઓ દ્વારા આ વધારાના ચાર્જિસ વહેલી તકે પાછા ખેંચવામાં નહીં આવે, તો આગામી દિવસોમાં વેપારી મંડળો દ્વારા વધુ ઉગ્ર આંદોલન કરવામાં આવશે તેવી કડક ચેતવણી પણ આપવામાં આવી છે.

ડિજિટલ પેમેન્ટ અને વેપારીઓની મુશ્કેલીઓ

ડિજિટલ વ્યવહારોને પ્રોત્સાહન આપવાના દાવા વચ્ચે વધારાના ચાર્જિસ અને મર્યાદાઓ લાદવાથી વેપારી વર્ગ મુશ્કેલીમાં મુકાય છે. સરકાર અને વેપારીઓ વચ્ચે યોગ્ય સંકલનથી જ આર્થિક સમસ્યાઓનો કાયમી ઉકેલ લાવી શકાય છે.