• બાળક દીવાલ સાથે અથડાયું, મહિલા કીચડમાં પટકાઈ, તંત્રની કામગીરી પર સવાલ
•  બિસ્માર રસ્તા અને કાદવને કારણે સર્જાયો અકસ્માત, સીસીટીવીમાં દ્રશ્યો કેદ
• એક્ટિવા સ્લિપ થતાં મહિલા અને બાળક દૂર ફેંકાયા, અકસ્માતની કરુણ ઘટના

સિટી ન્યુઝ @ વડોદરા

વડોદરાના આજવા રોડ વિસ્તારમાં આવેલ લકુલેશ નગરમાં બિસ્માર રસ્તાઓ અને કાદવ-કીચડને કારણે એક ગમખ્વાર અકસ્માત સર્જાયો હતો. એક મહિલા પોતાના બાળકને એક્ટિવા પર શાળાએ મૂકવા જઈ રહી હતી ત્યારે રસ્તા પરના કાદવને કારણે વાહન પરથી કાબૂ ગુમાવી દેતા એક્ટિવા સ્લિપ થઈ ગયું હતું. આ અકસ્માત એટલો ભયાનક હતો કે પાછળ બેસેલું બાળક ફંગોળાઈને સીધું દીવાલ સાથે અથડાયું હતું, જ્યારે મહિલા પણ એક્ટિવા સાથે રસ્તાથી ૧૫ ફૂટ દૂર કાદવમાં પટકાઈ હતી.

આ સમગ્ર ઘટના ત્યાં લાગેલા સીસીટીવી કેમેરામાં કેદ થઈ ગઈ હતી. ફૂટેજમાં જોઈ શકાય છે કે કાદવના કારણે વાહન પરથી કાબૂ ગુમાવતા જ મહિલા અને બાળક કેવી રીતે ફંગોળાય છે. ઘટના બાદ સ્થાનિક લોકોમાં ભારે રોષ જોવા મળી રહ્યો છે. ચોમાસાની શરૂઆતમાં જ વડોદરા મહાનગરપાલિકાની પ્રી-મોન્સૂન કામગીરીની પોલ ખુલ્લી પડી ગઈ છે. મુખ્ય માર્ગો સિવાય સોસાયટીઓના આંતરિક રસ્તાઓ ખાડા અને કાદવથી ખદબદી રહ્યા છે, જે વાહનચાલકો માટે જોખમી બન્યા છે.

આ કિસ્સો વાલીઓ અને તમામ વાહનચાલકો માટે લાલબત્તી સમાન છે. જ્યારે રસ્તાઓ પર પાણી ભરાયેલા હોય અથવા કાદવ હોય ત્યારે વાહનની ગતિ અત્યંત ધીમી રાખવી હિતાવહ છે. ખાસ કરીને જ્યારે તમારી સાથે બાળકો હોય, ત્યારે રસ્તાની સ્થિતિને પારખીને વાહન ચલાવવું જોઈએ જેથી આવી દુર્ઘટનાઓથી બચી શકાય. આ ઘટનાએ ફરી એકવાર તંત્રની નબળી કામગીરી અને રસ્તાઓની જાળવણીના અભાવને ઉજાગર કર્યો છે.