સિટી ન્યુઝ @ ભાવનગર

ભાવનગર જિલ્લાના ગારીયાધાર તાલુકાના માંડવી ગામના મૂળ વતની અને હાલ સુરતના અમરોલી ખાતે રહેતા કમલેશભાઈ ડાયાભાઈ પાલડીયા નામના વેપારીના પ્લોટ બાબતે ચાલી રહેલી અદાવતમાં જેસીબી વડે પ્લોટની પાકી દિવાલ તોડી પાડી ભારે આર્થિક નુકસાન પહોંચાડવામાં આવ્યું હોવાની અને જાનથી મારી નાખવાની ધમકી આપ્યાની ગંભીર ઘટના સામે આવી છે, જેને લઈને ભોગ બનનાર વેપારીએ ગારીયાધાર પોલીસ મથકે બે ઈસમો વિરુદ્ધ સત્તાવાર ફરિયાદ નોંધાવી છે.

ગારીયાધાર પોલીસ મથકેથી પ્રાપ્ત વિગતો અનુસાર, કમલેશભાઈ પાલડીયા ઉ.વ.38 ના નામે તેમના મૂળ વતન માંડવી ખાતે ગામ નમુના નં.2, અનુ.422 વાળો 334.45 ચોરસ મીટરનો ગામતળ પ્લોટ આવેલો છે. આ પ્લોટની બાજુમાં જ કલ્યાણભાઈ કરમશીભાઈ બેલડીયાનો પ્લોટ આવેલો હોવાથી તેઓ છેલ્લા એકાદ વર્ષથી આ પ્લોટ પોતાના કબજામાં લેવા માટે વેપારી પર અવારનવાર દબાણ કરી વિવાદ ઊભો કરી રહ્યા હતા.

ગત તા. 22/8/26 ના રોજ રાત્રિના સવા આઠ વાગ્યાના અરસામાં કમલેશભાઈ સુરત ખાતે હાજર હતા ત્યારે તેમણે પોતાના પ્લોટ પર લગાવેલા સીસીટીવી કેમેરાનું લાઈવ ફૂટેજ મોબાઈલમાં નિહાળ્યું હતું, જેમાં એક જેસીબી મશીન વડે તેમના પ્લોટની ત્રણેય બાજુની પાકી દિવાલ ગેરકાયદેસર રીતે તોડવામાં આવી રહી હોવાનું સ્પષ્ટપણેજ નજરે પડ્યું હતું, જે જોઈને તેઓ ચોંકી ઉઠ્યા હતા.

આ અંગે કમલેશભાઈએ સઘન તપાસ કરતા માલૂમ પડ્યું હતું કે કલ્યાણભાઈ કરમશીભાઈ બેલડીયા તથા ગોરખભાઈ નાનુભાઈ ડેર (બંને રહે. માંડવી, તા. ગારીયાધાર) નાઓએ પરસ્પર સળવળાટ કરીને સાથે મળીને જેસીબી વડે આ દિવાલ તોડી પાડીને મોટું આર્થિક નુકસાન પહોંચાડ્યું છે. આ ઉપરાંત, ગોરખભાઈ ડેરે આ પ્લોટ મામલે છેલ્લા બે મહિનામાં કમલેશભાઈને બે થી ત્રણ વખત જાનથી મારી નાખવાની ગંભીર ધમકીઓ પણ આપી હતી.

આ સમગ્ર મામલે કમલેશભાઈ પાલડીયાએ કલ્યાણભાઈ બેલડીયા અને ગોરખભાઈ ડેર વિરુદ્ધ કાયદેસરની કડક કાર્યવાહી હાથ ધરવા માટે પોલીસ સમક્ષ લેખિત ફરિયાદ નોંધાવી છે. પોલીસે આ મામલે ગુનો નોંધીને આગળની સઘન તપાસ શરૂ કરી છે અને આરોપીઓની સંડોવણી અંગેની કાનૂની પ્રક્રિયા હાથ ધરી છે.

જમીન વિવાદ અને કાયદાકીય સુરક્ષા

મિલકત અને જમીન બાબતે ચાલતા વિવાદોમાં કાયદો હાથમાં લઈને બળજબરી કે તોડફોડ કરવી એ ગંભીર અપરાધ છે. આવા બનાવોમાં પક્ષકારોએ અદાલતી માર્ગ કે વહીવટી તંત્રનો સહારો લેવો જોઈએ, જેથી કાયદાનું શાસન જળવાઈ રહે અને સામાજિક સ્તરે અશાંતિ કે હિંસા ફેલાતી અટકી શકે.