• LCB ની મોટી કાર્યવાહી: કુખ્યાત બુટલેગરને સુરતની લાજપોર જેલમાં ધકેલાયો
• ગંગેશ્વર મહાદેવ પાસે રહેતા આરોપીની ધરપકડ, સુરત જેલ હવાલે
• અગાઉ અનેક પ્રોહીબિશનના ગુનામાં સંડોવાયેલા શખ્સ પર કાર્યવાહી

સિટી ન્યુઝ @ જામનગર

જામનગર જિલ્લામાં અસામાજિક પ્રવૃત્તિઓ અને દારૂના દુષણને ડામવા માટે પોલીસ તંત્ર દ્વારા સક્રિય પગલાં લેવામાં આવી રહ્યા છે. રેન્જ આઈ.જી. નિર્લિપ્ત રાય અને જિલ્લા પોલીસ અધિક્ષક ડો. રવિ મોહન સૈનીના માર્ગદર્શન હેઠળ, સ્થાનિક ક્રાઈમ બ્રાન્ચ (LCB) એ પ્રોહીબિશનના ગુનામાં વારંવાર સંડોવાતા એક કુખ્યાત બુટલેગર સામે પાસા (PASA) હેઠળ કડક કાર્યવાહી કરી છે. LCB ટીમે આરોપીની ગુનાહિત ઇતિહાસની દરખાસ્ત તૈયાર કરીને જિલ્લા મેજિસ્ટ્રેટ પી.બી. પંડ્યા સમક્ષ રજૂ કરી હતી, જેના આધારે તેમણે તાત્કાલિક પાસા વોરંટ ઇસ્યુ કર્યું હતું.

પોલીસે ગંગેશ્વર મહાદેવ મંદિર પાસે રહેતા યશપાલસિંહ નરેન્દ્રસિંહ જાડેજા નામના બુટલેગરને ઝડપી પાડી, પાસા વોરંટની બજવણી કરી હતી. આરોપી અગાઉ પણ દારૂના અનેક ગુનાઓમાં સંડોવાયેલો હોવાથી તેને કાયદાના ડર હેઠળ સુરતની લાજપોર મધ્યસ્થ જેલ ખાતે મોકલી આપવામાં આવ્યો છે. આ કામગીરીમાં LCB પી.આઈ. વી.બી. ચૌધરી, પી.એસ.આઈ. એમ.વી. ભાટીયા અને તેમની ટીમના વિવિધ કર્મચારીઓ જોડાયા હતા.

આ પ્રકારની કડક કાર્યવાહીથી અસામાજિક તત્વોમાં ફફડાટ વ્યાપી ગયો છે. જામનગર પોલીસ દ્વારા અગાઉ પણ પ્રોહીબિશનના કેસોમાં સતત નજર રાખવામાં આવી રહી છે અને ભવિષ્યમાં પણ આવી ગુનાહિત પ્રવૃત્તિઓ કરનાર સામે પાસા જેવી કાયદાકીય કાર્યવાહી કરવાની પોલીસ તંત્રની નેમ છે.