• વરસાદી પાણીના નિકાલમાં અવરોધરૂપ દબાણો દૂર, એસ્ટેટ શાખા દ્વારા કામગીરી
• ચોમાસામાં પાણી ભરાવાની સમસ્યા નિવારવા મનપાનું આક્રમક વલણ
• વરસાદી પાણીનો નિકાલ સરળ બનાવવા 30 કર્મચારીઓની ટીમ તૈનાત

સિટી ન્યુઝ @ જામનગર

જામનગર મહાનગરપાલિકાની એસ્ટેટ શાખા દ્વારા આજે શહેરના આદર્શ સ્મશાન નજીક કેનાલ કાંઠે આવેલી મનપાની પોતાની જમીન પર થયેલા દબાણો દૂર કરવા માટે આક્રમક કાર્યવાહી કરવામાં આવી હતી. અગાઉ દબાણકર્તાઓને નોટિસ આપવામાં આવી હતી, પરંતુ અમલ ન થતા આજે તંત્રએ ડિમોલિશનની કામગીરી હાથ ધરી હતી. આ કામગીરીમાં અંદાજે 2800 ચોરસ ફૂટ વિસ્તારમાં આવેલા 3 પાકા અને 1 કાચા મળીને કુલ 4 મકાનો તોડી પાડવામાં આવ્યા હતા.

મહાપાલિકાના અધિકારીઓના જણાવ્યા મુજબ, આ બાંધકામો વરસાદી પાણીના નિકાલમાં સૌથી મોટો અવરોધ બની રહ્યા હતા. આગામી ચોમાસા દરમિયાન શહેરમાં પાણી ભરાવાની સમસ્યા નિવારવા અને વરસાદી પાણીનો પ્રવાહ અવરોધ વિના વહી શકે તે માટે આ દબાણો દૂર કરવા જરૂરી હતા. આ કામગીરી માટે એસ્ટેટ શાખાના લગભગ 30 કર્મચારીઓની ટીમ તૈનાત કરવામાં આવી હતી અને બે જેસીબી, બે ટ્રેક્ટર તથા પે-લોડર જેવા આધુનિક સાધનોની મદદથી કામ પૂર્ણ કરવામાં આવ્યું હતું.

આ સમગ્ર કાર્યવાહી દરમિયાન કોઈપણ અનિચ્છનીય બનાવ ન બને તે માટે સ્થળ પર ચુસ્ત પોલીસ સુરક્ષા વ્યવસ્થા પણ જાળવવામાં આવી હતી. મહાનગરપાલિકાએ સ્પષ્ટ શબ્દોમાં ચેતવણી આપી છે કે જાહેર જમીન પરના દબાણો અને વરસાદી પાણીના નિકાલમાં નડતરરૂપ બાંધકામો સામે ભવિષ્યમાં પણ આવી જ રીતે નિયમો મુજબ કાર્યવાહી કરવામાં આવશે.