સિટી ન્યુઝ @ વડોદરા

દિલ્હી-મુંબઈ એક્સપ્રેસવે પર વડોદરા જિલ્લાના પાદરા નજીક આવેલા સરસવણી ગામ પાસે મોડી રાત્રે એક ટ્રેલર અને એલપીજી (LPG) ગેસ ભરેલા ટેન્કર વચ્ચે ગંભીર અકસ્માત સર્જાયો હતો. સામસામે થયેલી જોરદાર ટક્કર બાદ ગેસ ટેન્કર ચાલકે સંતુલન ગુમાવતાં ટેન્કર હાઈવે પર જ પલટી મારી ગયું હતું, જેના કારણે માર્ગ પર ભારે અફરાતફરીનો માહોલ સર્જાયો હતો.

ગેસ ગળતર કે ભીષણ આગ જેવી કોઈ મોટી હોનારત ન સર્જાય તે માટે તકેદારીના ભાગરૂપે કરજણ અને પાદરા ફાયર વિભાગની ટીમો તાત્કાલિક ઘટનાસ્થળે દોડી ગઈ હતી. વહીવટી તંત્ર અને પોલીસ કાફલાએ પરિસ્થિતિની ગંભીરતા જોઈને સમગ્ર વિસ્તારને કોર્ડન કરી લીધો હતો અને ફાયર ફાઈટર્સને ઘટનાસ્થળે સ્ટેન્ડબાય રાખવામાં આવ્યા હતા.

અકસ્માત સર્જાયાના 12 કલાકથી વધુ સમય વીતી ગયો હોવા છતાં કંપની દ્વારા 'જીવતા બોમ્બ' સમાન આ જોખમી ગેસ ટેન્કરને હાઈવે પરથી હટાવવામાં આવ્યું ન હોવાથી સ્થાનિકો અને વાહનચાલકોમાં ભારે ચિંતા જોવા મળી રહી છે.

સંબંધિત ગેસ કંપની દ્વારા જણાવવામાં આવ્યું હતું કે સુરક્ષાના તમામ માપદંડો સાથે પલટી ગયેલા ટેન્કરમાંથી એલપીજી ગેસને અન્ય ખાલી ટેન્કરમાં ટ્રાન્સફર કરવાની જટિલ ટેકનિકલ પ્રક્રિયા હાથ ધરવામાં આવી રહી છે. સ્થાનિક વહીવટી તંત્ર અને પોલીસ આ કામગીરી પર સતત નજર રાખી રહ્યા છે.

રોજના હજારો વાહનોની અવરજવર ધરાવતા આ વ્યસ્ત એક્સપ્રેસવે પર સુરક્ષા ખાતર રાતથી જ વાહનવ્યવહારને વન-વે કરી દેવામાં આવ્યો હતો. પોલીસ તંત્ર દ્વારા હાલ એક તરફનો માર્ગ ખુલ્લો રાખીને વાહનોને સુરક્ષિત ડાયવર્ઝન આપવામાં આવી રહ્યું છે.

પાદરા નજીક LPG ટેન્કર પલટાયું

દિલ્હી-મુંબઈ એક્સપ્રેસવે પર વડોદરાના પાદરા નજીક ટ્રેલર સાથે ટક્કર બાદ LPG ભરેલું ટેન્કર પલટી ગયું હતું. 12 કલાક વીત્યા છતાં જોખમી ટેન્કર ન હટાવાતાં સુરક્ષા અર્થે ફાયર ટીમો સ્ટેન્ડબાય રખાઈ છે અને એક્સપ્રેસવેને વન-વે કરાયો છે. ગેસને અન્ય ટેન્કરમાં ટ્રાન્સફર કરવાની ટેકનિકલ કામગીરી શરૂ કરવામાં આવી છે.