સિટી ન્યુઝ @ બેંગ્લોર : ગુરુવારે લખનૌના એકાના સ્ટેડિયમ ખાતે રમાયેલી IPL 2026 ની રોમાંચક મેચમાં લખનૌ સુપર જાયન્ટ્સે (LSG) રોયલ ચેલેન્જર્સ બેંગ્લોરને (RCB) 9 રને પરાજય આપ્યો છે. વરસાદને કારણે મેચ 19 ઓવરની કરવામાં આવી હતી અને ડકવર્થ-લુઇસ (DLS) પદ્ધતિ હેઠળ RCB ને 213 રનનો સુધારેલો લક્ષ્યાંક આપવામાં આવ્યો હતો. જોકે, બેંગ્લોરની ટીમ 19 ઓવરમાં 6 વિકેટે 203 રન જ બનાવી શકી હતી. આ જીત સાથે LSG એ વર્તમાન સીઝનમાં પોતાની ત્રીજી જીત નોંધાવી છે, જ્યારે RCB એ ચોથી હારનો સામનો કરવો પડ્યો છે.

લખનૌ દ્વારા મૂકવામાં આવેલા વિશાળ લક્ષ્યાંકનો પીછો કરવા ઉતરેલી RCB ની શરૂઆત અત્યંત ખરાબ રહી હતી. ઓપનર જેકબ બેથેલને મોહમ્મદ શમીએ માત્ર 4 રને આઉટ કર્યો હતો, જ્યારે સ્ટાર બેટ્સમેન વિરાટ કોહલી પ્રિન્સ યાદવની બોલિંગમાં શૂન્ય રને પેવેલિયન ભેગો થયો હતો. માત્ર 9 રનમાં 2 વિકેટ ગુમાવ્યા બાદ કેપ્ટન રજત પાટીદાર (61 રન) અને દેવદત્ત પડિકલ (34 રન) એ 95 રનની ભાગીદારી કરીને ઈનિંગને સંભાળી હતી. પાટીદારે પોતાની આક્રમક ઈનિંગમાં 6 ગગનચુંબી છગ્ગા ફટકાર્યા હતા.

મેચના અંતિમ તબક્કામાં ટિમ ડેવિડે 17 બોલમાં 40 રન ફટકારીને આશા જગાવી હતી, પરંતુ તે ટીમને જીત સુધી પહોંચાડી શક્યો નહીં. કુણાલ પંડ્યા 28 રન અને રોમારિયો શેફર્ડ 23 રને અણનમ રહ્યા હતા, તેમ છતાં ટીમ લક્ષ્યથી 9 રન પાછળ રહી ગઈ હતી. LSG તરફથી યુવા બોલર પ્રિન્સ યાદવે તરખાટ મચાવતા 33 રન આપીને 3 મહત્વની વિકેટ ઝડપી હતી, જ્યારે શાહબાઝ અહેમદે 2 અને મોહમ્મદ શમીએ 1 વિકેટ ઝડપી હતી.

અગાઉ, ટોસ જીતીને પ્રથમ બેટિંગ કરતા લખનૌએ નિર્ધારિત 20 ઓવરમાં 3 વિકેટે 209 રનનો વિશાળ સ્કોર બનાવ્યો હતો. મિશેલ માર્શે વિસ્ફોટક બેટિંગ કરતા માત્ર 56 બોલમાં 111 રન બનાવ્યા હતા. માર્શે અર્શીન કુલકર્ણી (17 રન) સાથે 95 રન અને નિકોલસ પૂરન (38 રન) સાથે 70 રનની ભાગીદારી કરી હતી. અંતિમ ઓવરમાં કેપ્ટન ઋષભ પંતે માત્ર 10 બોલમાં 32 રનની તોફાની ઈનિંગ રમીને સ્કોરને 200 ને પાર પહોંચાડ્યો હતો.

મિશેલ માર્શે આ મેચમાં માત્ર 49 બોલમાં પોતાની સદી પૂરી કરીને નવો રેકોર્ડ સ્થાપિત કર્યો હતો. તેણે ઋષભ પંતના 54 બોલમાં સદીના રેકોર્ડને તોડી નાખ્યો છે. માર્શે માત્ર 20 બોલમાં પોતાની સૌથી ઝડપી ફિફ્ટી પણ ફટકારી હતી. વરસાદને કારણે રમત બે વાર અટકી હોવા છતાં માર્શની એકાગ્રતા અકબંધ રહી હતી અને તેણે 9 ચોગ્ગા તથા 9 છગ્ગાની મદદથી 111 રનની યાદગાર ઈનિંગ રમી હતી. આ ભવ્ય પ્રદર્શન બદલ તેને મેન ઓફ ધ મેચ જાહેર કરવામાં આવ્યો હતો.