• PNB કૌભાંડના 321 કરોડના કેસને સ્પેશિયલ સીબીઆઈ કોર્ટે સામાન્ય મેજિસ્ટ્રેટ કોર્ટમાં ટ્રાન્સફર કર્યો
• નીરવ મોદી કેસમાં મોટો વળાંક, બેન્ક અધિકારીઓને ક્લીનચિટ
• તપાસ દરમિયાન ભ્રષ્ટાચાર નિવારણ કાયદા હેઠળ કોઈ મજબૂત પુરાવા ન મળતા સીબીઆઈ કોર્ટનો નિર્ણય

સિટી ન્યુઝ @ મુંબઈ

પંજાબ નેશનલ બેન્ક (PNB) કૌભાંડના મુખ્ય આરોપી અને ભાગેડુ હીરા વેપારી નીરવ મોદીના કેસમાં એક અત્યંત મહત્વનો અને મોટો કાનૂની વળાંક આવ્યો છે. મુંબઈની સ્પેશિયલ સીબીઆઈ કોર્ટે આ કથિત છેતરપિંડીના હાઈ-પ્રોફાઈલ કેસને હવે સુનાવણી માટે સામાન્ય મેજિસ્ટ્રેટ કોર્ટમાં મોકલી આપ્યો છે. આ મોટા ફેરફાર પાછળનું મુખ્ય કારણ એ છે કે, કેન્દ્રીય તપાસ એજન્સી સીબીઆઈને સઘન તપાસ દરમિયાન પંજાબ નેશનલ બેન્કના તત્કાલીન અધિકારીઓ વિરૂદ્ધ 'પ્રિવેન્શન ઓફ કરપ્શન એક્ટ' (ભ્રષ્ટાચાર નિવારણ કાયદો) હેઠળ ભ્રષ્ટાચારના કોઈ નક્કર કે મજબૂત પુરાવા મળ્યા નથી.

પંજાબ નેશનલ બેન્કની સત્તાવાર ફરિયાદના આધારે શરૂ થયેલા આ કેસમાં નીરવ મોદીની માલિકીની કંપનીઓ પર એવો ગંભીર આરોપ હતો કે તેણે સર્ક્યુલર ટ્રાન્ઝેક્શન કરીને 321.88 કરોડ રૂપિયાની ક્રેડિટ સુવિધાઓનો ગેરકાનૂની અને ખોટો ઉપયોગ કર્યો હતો. જો કે, હવે આ કેસમાંથી ભ્રષ્ટાચારના આરોપો હટી જતાં તેની આખી કાનૂની દિશા બદલાઈ ગઈ છે અને સરકારી બેન્કના કોઈ અધિકારી સત્તાવાર રીતે સંડોવાયેલા ન હોવાથી સીબીઆઈ માત્ર ખાનગી વ્યક્તિઓ વિરૂદ્ધ જ ચાર્જશીટ દાખલ કરશે. આથી આ કેસ હવે સ્પેશિયલ સીબીઆઈ કોર્ટના અધિકારક્ષેત્ર બહાર હોવાથી મેજિસ્ટ્રેટ કોર્ટમાં સામાન્ય છેતરપિંડીના કેસ તરીકે ચાલશે.

સીબીઆઈ તરફથી કોર્ટમાં હાજર રહેલા પબ્લિક પ્રોસિક્યુટર વિક્રમ સિંહે જણાવ્યું હતું કે, સઘન તપાસ છતાં બેન્ક અધિકારીઓ કે અન્ય ખાનગી વ્યક્તિઓ વિરૂદ્ધ ભ્રષ્ટાચારના ગુનાહિત પુરાવા મળ્યા નથી પરંતુ ખાનગી પક્ષો વિરૂદ્ધ ગુનાહિત કાવતરું (Conspiracy) અને છેતરપિંડી (Cheating)ના આરોપો હેઠળ કાનૂની કાર્યવાહી ચાલુ રાખવા માટે પૂરતા પુરાવા છે. અત્રે ઉલ્લેખનીય છે કે, આ 321.88 કરોડ રૂપિયાનો ફ્રોડ કેસ નીરવ મોદી અને મેહુલ ચોક્સી સાથે જોડાયેલા દેશના સૌથી મોટા 13000 કરોડ રૂપિયાના PNB મહાકૌભાંડનો જ એક ભાગ છે. હાલમાં બંને આરોપીઓ વિદેશમાં પ્રત્યાર્પણની કાનૂની લડાઈ લડી રહ્યા છે, જેમાં ચોક્સી બેલ્જિયમમાં અને નીરવ મોદી યુકેમાં છે.