• નબળી ગુણવત્તાના રસ્તાથી વાહનચાલકો પરેશાન, વાહનનું સ્ટેરિંગ તૂટતા આર્થિક ફટકો પડ્યો
• લાંબા સમયથી તૂટેલા રસ્તા પર માત્ર માટી નાખી ખાતરી, ચોમાસામાં લોકોની મુશ્કેલી વધી
• ટેન્કર ફસાતા 3 કલાક સુધી ટ્રાફિક જામ, સ્થાનિકોમાં નગરપાલિકાના કામકાજને લઈને ભારે નારાજગી

સિટી ન્યૂઝ @ પાટડી

પાટડીના નવા બસસ્ટેન્ડ પાસે નગરપાલિકા દ્વારા કરવામાં આવેલી કામચલાઉ સમારકામની કામગીરીની પોલ ખુલી ગઈ છે. લાંબા સમયથી તૂટેલા અને બિસ્માર રસ્તા પર પાલિકા દ્વારા માત્ર માટી નાખીને કામ પતાવવાનો પ્રયાસ કરવામાં આવ્યો હતો, પરંતુ વરસાદ આવતા જ આ માટી કાદવમાં ફેરવાઈ ગઈ છે. પરિણામે, આજે એક ટેન્કર આ કાદવવાળા રસ્તામાં ફસાઈ ગયું હતું, જેને બહાર કાઢવા માટે વાહનચાલકે 2 થી 3 કલાક સુધી ભારે જહેમત ઉઠાવવી પડી હતી.

આ ઘટનામાં ટેન્કરનો સ્ટેરિંગ રોડ તૂટી જતાં વાહનચાલકને હજારો રૂપિયાનું આર્થિક નુકસાન વેઠવાનો વારો આવ્યો છે. સ્થાનિક રહીશો અને વાહનચાલકોમાં નગરપાલિકાના વહીવટ સામે ભારે રોષ જોવા મળી રહ્યો છે. લોકોની ફરિયાદ છે કે, પાલિકા દ્વારા બનાવવામાં આવતા રસ્તાઓની ગુણવત્તા એટલી નબળી હોય છે કે તે માંડ એક વર્ષ પણ ટકી શકતા નથી. ચોમાસા દરમિયાન રસ્તાઓનું ધોવાણ થવું અને ખાડાઓમાં માટી ભરીને સમારકામ કરવાની આ પદ્ધતિ વાહનચાલકો માટે અકસ્માતોનું કારણ બની રહી છે.

વહીવટી તંત્રની આ પ્રકારની કામચલાઉ નીતિને કારણે પ્રજાને પારાવાર હાલાકી ભોગવવી પડી રહી છે. સ્થાનિકોએ માગ કરી છે કે રસ્તાઓનું કાયમી સમારકામ કરવામાં આવે અને નબળી ગુણવત્તાનું કામ કરનાર જવાબદારો સામે પગલાં લેવામાં આવે. પાટડીમાં સર્જાયેલી આ સ્થિતિ માત્ર એક ટેન્કરની વાત નથી, પરંતુ પાલિકાના ભ્રષ્ટ વહીવટ અને આયોજનના અભાવનું પ્રતિબિંબ છે. રસ્તા પર ફસાયેલા ટેન્કરને આખરે ભારે મથામણ બાદ બહાર કાઢવામાં આવ્યું હતું, પરંતુ સવાલ એ છે કે ક્યાં સુધી વાહનચાલકો આ રીતે નુકસાન ભોગવતા રહેશે?