સિટી ન્યુઝ @ ગાંધીનગર

પૂર્વ મુખ્યમંત્રી શંકરસિંહ વાઘેલાના ફરી એકવાર કોંગ્રેસમાં જોડાવાની સંભાવનાઓને લઈને ગુજરાતના રાજકારણમાં ભારે ચર્ચાઓ અને અટકળોનો દોર શરૂ થઈ ગયો છે. બાપુ કોંગ્રેસમાં પરત ફરે તો તેની પ્રદેશના રાજકારણ અને સામાજિક સમીકરણો પર કેટલી અસર થઈ શકે તે અંગે રાજકીય વિશ્લેષકો તથા રાજપૂત સમાજના આગેવાનોના મત અલગ-અલગ જોવા મળી રહ્યા છે. કેટલાકના મતે વાઘેલા કોંગ્રેસને રાજ્યવ્યાપી ઓળખ ધરાવતો મજબૂત ચહેરો આપી શકે છે.

રાજકીય વિશ્લેષક જયનારાયણ વ્યાસના મતે શંકરસિંહ વાઘેલાના કોંગ્રેસમાં આવવાથી ઘણો મોટો ફરક પડી શકે છે, કારણ કે ભાજપ સામે મજબૂત ટક્કર લેવા માટે પ્રદેશમાં પ્રભાવશાળી નેતૃત્વની જરૂર છે. વાઘેલાને ગુજરાતના રાજકારણ અને ભાજપના રાજકીય માળખાની ઊંડી સમજ છે, જે તેમની સૌથી મોટી તાકાત બની શકે છે. જોકે, તેમણે એ પણ સ્પષ્ટ કર્યું કે માત્ર બાપુના આગમનથી પરિણામો બદલાશે નહીં, પરંતુ કોંગ્રેસે પોતાનું ગ્રાસરૂટ સંગઠન મજબૂત કરવું પડશે.

અન્ય રાજકીય વિશ્લેષક વિદ્યુત જોશીના મતે વાઘેલા જો વિવિધ સામાજિક કે જનઆંદોલનોને અસરકારક રીતે ટેકો આપે અને યુવાનોના શિક્ષણ, રોજગાર જેવા પ્રશ્નો સાથે સીધો સંવાદ સ્થાપે તો જ તેમની ભૂમિકા પ્રભાવશાળી સાબિત થઈ શકે છે. માત્ર પરંપરાગત રાજકીય ઓળખ પૂરતી નહીં રહે, પરંતુ નવી પેઢીના મુદ્દાઓ સાથે સક્રિય જોડાણ કરવું અનિવાર્ય બનશે.

વિશ્લેષક પ્રશાંત ગઢવીના મતે છેલ્લા કેટલાક વર્ષોમાં કોંગ્રેસમાં જોવા મળેલી નિષ્ક્રિયતાની સ્થિતિમાં બાપુનું આગમન કાર્યકરોમાં નવી ઊર્જા અને સક્રિયતા લાવી શકે છે. કોંગ્રેસની બહાર ગયેલા અથવા નારાજ થઈને બેઠેલા કેટલાક કાર્યકરો પણ વાઘેલાના નેતૃત્વ અને તેમના જૂના સંબંધોને કારણે ફરી પક્ષ સાથે જોડાઈ શકે છે, તેમજ ઉમેદવાર પસંદગીમાં તેમની સમજ ઉપયોગી બની શકે છે.

આ તમામ ચર્ચાઓ વચ્ચે આગામી દિવસોમાં ગુજરાતના રાજકારણમાં નવા સમીકરણો રચાઈ શકે છે. જો વિપક્ષ પોતાના આંતરિક મતભેદો ભૂલીને જનતાના વાસ્તવિક મુદ્દાઓ પર એક થઈને લડત ચલાવશે, તો જ રાજકીય ક્ષેત્રે કોઈ મોટો ફેરફાર જોવા મળી શકશે અન્યથા માત્ર વ્યક્તિગત આગમનથી પરિસ્થિતિ બદલાવી મુશ્કેલ છે.

રાજકીય નેતૃત્વ અને પક્ષીય સંગઠન

કોઈપણ રાજકીય પક્ષની સફળતા માટે કેરિઝમેટિક નેતૃત્વની સાથે મજબૂત પાયાનું સંગઠન હોવું સૌથી મહત્વની શરત છે. માત્ર મોટા ચહેરાઓ બદલવાથી જમીની હકીકતો અને જનતાના પ્રશ્નો હલ થઈ શકતા નથી.