• હિટ એન્ડ રન કેસમાં આરોપીનો પીછો કરી યુવક ડમ્પર લાવ્યો, માતાને મૃત હાલતમાં જોઈ સ્તબ્ધ
•  નશામાં ધૂત ચાલકે મોપેડ સવારને ઉડાવ્યા, સ્થાનિકોએ આપ્યો મેથીપાક
• સાવલીમાં ડમ્પર ચાલક સામે ફરિયાદ નોંધાઈ, ફરાર આરોપીની શોધખોળ તેજ

સિટી ન્યુઝ @ વડોદરા

વડોદરા જિલ્લામાં ૧૦ જુલાઈની સાંજ અકસ્માતની બે ભયાનક ઘટનાઓ સાથે ભારે આઘાતજનક બની રહી. સાવલી તાલુકાના પ્રથમપુરા પાસે એક હાઈવા ડમ્પરે ૫૯ વર્ષીય મહિલા શારદાબેન પરમારને કચડી નાખતા તેમનું ઘટનાસ્થળે જ કરુણ મોત નિપજ્યું હતું. આ ઘટના બાદ ડમ્પર ચાલક વાહન મૂકીને નાસી છૂટ્યો હતો. અકસ્માત નજીક રહેલા અલ્પેશકુમાર પરમારે હિંમત દાખવી ડમ્પરનો પીછો કર્યો અને તે વાહન પરત ઘટનાસ્થળે લાવ્યા હતા. જોકે, જ્યારે તેમણે ઈજાગ્રસ્ત મહિલાને નજીકથી જોયા ત્યારે તે અન્ય કોઈ નહીં પરંતુ તેમની પોતાની માતા હોવાનું સામે આવતા અલ્પેશકુમાર ભાંગી પડ્યા હતા. સાવલી પોલીસે અજાણ્યા ડમ્પર ચાલક સામે ગુનો નોંધીને તપાસ હાથ ધરી છે.

બીજી ઘટના વડોદરા શહેરના ઐતિહાસિક માંડવી ગેટ પાસે બની હતી, જ્યાં નશામાં ધૂત કાર ચાલક અશ્વિનભાઈ પરમારે એક્ટિવા સવાર એક જ પરિવારના ત્રણ સભ્યોને અડફેટે લીધા હતા. આ અકસ્માતમાં ત્રણેય વ્યક્તિઓને ગંભીર ઈજાઓ પહોંચતા તેમને સયાજી હોસ્પિટલ ખસેડવામાં આવ્યા છે. અકસ્માત બાદ ઉશ્કેરાયેલા સ્થાનિકોએ નશાખોર કાર ચાલકને પકડી મેથીપાક ચખાડ્યો હતો. પોલીસે ઘટનાસ્થળે પહોંચી આરોપીની ધરપકડ કરી પ્રોહિબિશન એક્ટ હેઠળ ગુનો દાખલ કર્યો છે.

આ બંને ઘટનાઓએ વડોદરામાં વાહનચાલકોની બેદરકારી અને નશાખોરીનો ગંભીર મુદ્દો ફરીથી ચર્ચામાં મૂક્યો છે. એક તરફ માતા ગુમાવવાનો આઘાત છે, તો બીજી તરફ દારૂના નશામાં વાહન ચલાવતા લોકોની બેજવાબદારીને કારણે નિર્દોષ લોકોનો ભોગ લેવાઈ રહ્યો છે. પોલીસ તંત્ર દ્વારા આ બંને મામલે કડક તપાસના આદેશ આપવામાં આવ્યા છે.