સિટી ન્યુઝ @ અમદાવાદ

આજકાલ ઘણા લોકો પોતાના ઘરમાં વિવિધ પ્રાણીઓ અને પક્ષીઓ પાળવાનો શોખ ધરાવે છે. પ્રાણીઓ માત્ર માનવના સારા મિત્રો જ નથી હોતા, પરંતુ જ્યોતિષશાસ્ત્ર અને વાસ્તુશાસ્ત્ર અનુસાર તેમને સૌભાગ્યનું પ્રતીક પણ માનવામાં આવે છે. કેટલાક પ્રાણીઓ એવા છે જેમના ઘરમાં રહેવાથી સકારાત્મક ઉર્જા વધે છે અને નકારાત્મકતા દૂર થાય છે. આ પ્રાણીઓના શુભ પ્રભાવથી ઘરમાં સુખ, શાંતિ અને સમૃદ્ધિનું આગમન થાય છે, એટલું જ નહીં કેટલાક પ્રાણીઓ તો સંપત્તિ અને વૈભવને પણ આકર્ષે છે.

વાસ્તુશાસ્ત્ર અને હિન્દુ ધર્મ મુજબ ઘરમાં સસલું પાળવું અત્યંત શુભ છે. સસલું ઘરમાંથી નકારાત્મકતા દૂર કરીને સકારાત્મકતા વધારે છે અને બાળકોને ખરાબ નજરથી રક્ષણ આપે છે. આ ઉપરાંત, કૂતરો પાળવાથી પણ ઘરમાં સકારાત્મક ઉર્જાનો વાસ થાય છે અને દુષ્ટ આત્માઓ ઘરથી દૂર રહે છે. હિન્દુ ધર્મમાં કૂતરાઓને ભગવાન ભૈરવના સંદેશવાહક પણ માનવામાં આવે છે. બિલાડી પાળવી પણ જ્યોતિષ મુજબ શુભ ગણાય છે, જે તણાવ ઘટાડવામાં અને શારીરિક સ્વાસ્થ્ય સુધારવામાં મદદરૂપ સાબિત થાય છે.

કેટલાક પ્રાણીઓ ઉપચાર માટે પણ જાણીતા છે. ઉદાહરણ તરીકે, ઘોડો પાળવો ખૂબ જ શુભ માનવામાં આવે છે કારણ કે તે તણાવ અને હતાશા દૂર કરવામાં મદદ કરે છે. જોકે, ઘરમાં જીવતો કાચબો પાળવાની વાસ્તુશાસ્ત્ર ભલામણ કરતું નથી, કારણ કે દરેક જીવ સ્વતંત્ર રહેવા માટે સર્જાયો છે. જોકે, કાચબાની મૂર્તિ ઘરમાં કે બેડરૂમમાં રાખવાના અનેક ફાયદાઓ છે, તે સકારાત્મક ઉર્જા આકર્ષે છે અને અનિદ્રા જેવી સમસ્યાઓ દૂર કરવામાં પણ અત્યંત મદદરૂપ થાય છે.

મૂર્તિઓનું પણ છે આગવું મહત્વ જે લોકો કોઈ કારણસર ઘરમાં પ્રાણીઓ પાળી શકતા નથી, તેઓ વાસ્તુશાસ્ત્ર મુજબ પ્રાણીઓની મૂર્તિઓ રાખીને પણ સકારાત્મક ઉર્જા પ્રાપ્ત કરી શકે છે. ખાસ કરીને ધાતુ કે સ્ફટિકના કાચબાની મૂર્તિ ઘરની ઉત્તર દિશામાં રાખવાથી આર્થિક સ્થિતિમાં સુધારો થાય છે અને બેડરૂમમાં રાખવાથી ઊંઘની સમસ્યા દૂર થાય છે. પ્રકૃતિ અને પ્રાણીઓ સાથેનો પ્રેમ ઘરના વાતાવરણને હંમેશા જીવંત અને હકારાત્મક બનાવી રાખે છે.