લાઈફસ્ટાઇલ 

ઘરે કલાકો સુધી પથારીમાં સૂઈને કે બેસીને કામ કરવાની આદત સામાન્ય લાગતી હોય છે, પરંતુ તે સ્વાસ્થ્ય માટે અત્યંત જોખમી સાબિત થઈ શકે છે. વર્ક ફ્રોમ હોમના યુગમાં ઘણા લોકો લેપટોપ ખોળામાં રાખીને પથારીમાં જ કામ કરે છે અથવા વિદ્યાર્થીઓ આખો દિવસ બેડ પર બેસીને અભ્યાસ કરે છે. આ આરામદાયક લાગતી પદ્ધતિ અજાણતાં જ શરીર માટે મોટો ખતરો પેદા કરે છે. પોષણશાસ્ત્રીઓના મતે, પથારીમાં સૂઈને કામ કરવાથી આપણા મેટાબોલિઝમમાં ગરબડ થાય છે અને બ્લડ સુગરનું પ્રમાણ અચાનક વધી શકે છે.

પલંગ પોતે બ્લડ સુગર નથી વધારતો, પરંતુ આખો દિવસ એક જ જગ્યાએ સ્થિર બેસી રહેવાથી શરીર અંદરથી નબળું પડે છે. આપણા સ્નાયુઓ શરીરનો સૌથી મોટો ગ્લુકોઝ સ્પોન્જ છે, જે ઇન્સ્યુલિનની મદદ વિના લોહીમાંથી સુગર શોષી લે છે. પરંતુ જ્યારે આપણે કલાકો સુધી આળસુ બનીને બેસી રહીએ છીએ, ત્યારે સ્નાયુઓ સક્રિય રહેતા નથી અને ગ્લુકોઝ યોગ્ય રીતે શોષાતો નથી. પરિણામે, ઇન્સ્યુલિનને વધારાની મહેનત કરવી પડે છે અને શરીરમાં 'ઇન્સ્યુલિન પ્રતિકાર' (Insulin Resistance) ઉત્પન્ન થાય છે.

આ ઉપરાંત, કામ કરતી વખતે બેડ પર બાજુમાં ચિપ્સ, બિસ્કિટ કે ઠંડા પીણાં રાખવાની ટેવ પણ મુશ્કેલી વધારી દે છે. ઊંઘનો અભાવ અને તણાવ પણ કોર્ટિસોલ હોર્મોનનું સ્તર વધારે છે. આ તમામ બાબતો ભવિષ્યમાં શરીરને ગંભીર રોગોનું ઘર બનાવી શકે છે. આરામના ચક્કરમાં શરીરને નુકસાન પહોંચાડવા કરતાં ટેબલ અને ખુરશી પર બેસીને કામ કરવાની યોગ્ય આદત અપનાવવી અનિવાર્ય છે.

સ્વાસ્થ્ય જાળવવાની સરળ ટિપ્સ

પથારીમાં કામ કરવાની આદત છોડીને યોગ્યસભર બેસવાની પદ્ધતિ અપનાવો, કામ દરમિયાન નિયમિત બ્રેક લો અને શારીરિક સક્રિયતા જાળવી રાખો જેથી ગંભીર બીમારીઓથી સુરક્ષિત રહી શકાય.