ઈકો સેન્સિટિવ ઝોનમાં તવાઈ: રિસોર્ટ-ફાર્મ હાઉસની યાદી તૈયાર કરી નોટીસ મોકલી

તંત્રના મેગા ઓપરેશનથી પર્યાવરણના નિયમો નેવે મૂકીને ચાલતા એકમોમાં ફફડાટ

સિટી ન્યૂઝ@જુનાગઢ

એશિયાટિક સિંહોના એકમાત્ર નિવાસસ્થાન ગીર અને ગીરનારની પ્રાકૃતિક ઓળખ જાળવી રાખવા માટે જૂનાગઢ જિલ્લા વહીવટીતંત્ર હવે આક્રમક એક્શન મોડમાં આવી ગયું છે. જંગલની આસપાસ આવેલા ઈકો સેન્સિટિવ ઝોન (ESZ) માં બિલાડીના ટોપની જેમ ફૂટી નીકેલા ગેરકાયદેસર મિલકતો સામે તબક્કાવાર અને કડક કાર્યવાહી હાથ ધરવામાં આવી રહી છે. વહીવટીતંત્રના આ મેગા ઓપરેશનથી પર્યાવરણના નિયમો નેવે મૂકીને ચાલતા એકમોમાં ફફડાટ વ્યાપી ગયો છે. આ કડક કાર્યવાહી અંગે જૂનાગઢના જિલ્લા કલેક્ટર યોગેશ ચૌધરીએ સ્પષ્ટતા કરતા જણાવ્યું હતું કે, આ સમગ્ર પ્રક્રિયા સુપ્રીમ કોર્ટના કડક આદેશ અને સરકારની

માર્ગદર્શિકાના પાલન સ્વરૂપે જ કરવામાં આવી રહી છે. વહીવટીતંત્ર દ્વારા જાહેર કરાયેલી યાદીમાં નિયમોનું ઉલ્લંઘન કરતા અનેક પ્રખ્યાત રિસોર્ટ, ફાર્મ હાઉસ, હોટલ અને અન્ય બાંધકામોનો પણ સમાવેશ થાય છે. આ તમામ મિલકતો સામે કાયદાકીય જોગવાઈઓ અનુસાર સંપૂર્ણ પારદર્શક રીતે પગલાં લેવાશે.કલેક્ટરે વધુમાં ભાર મૂકતા કહ્યું હતું કે, કાર્યવાહીનો હેતુ કોઈ ચોક્કસ વ્યક્તિ કે વ્યવસાયને

નિશાન બનાવવાનો બિલકુલ નથી. પરંતુ, ગીરનું જંગલ, ત્યાં વસતા વન્યજીવો અને સંવેદનશીલ પર્યાવરણનું સંરક્ષણ કરવું એ સમયની માંગ અને તંત્રની પ્રાથમિકતા છે. જે મિલકતો નિયમોની એસીડેસી કરીને ઊભી કરવામાં આવી છે, તેમની સામે નિયમાનુસાર જ કાર્યવાહી થશે. એ માત્ર જૂનાગઢ કે ગુજરાતની જ નહીં, પરંતુ સમગ્ર દેશની અમૂલ્ય કુદરતી ધરોહર છે. તંત્રની આ મેગા ડ્રાઈવ એ વાતનો સ્પષ્ટ સંદેશ આપે છે કે પ્રવાસન અને વિકાસ ચોક્કસપણે જરૂરી છે, પરંતુ તે કાયદાની મર્યાદામાં અને પર્યાવરણના ભોગે તો ક્યારેય જ ન હોવો જોઈએ. ગીરના જંગલ અને સિંહોના અસ્તિત્વને ટાવી રાખવા માટે લેવાયેલું આ કડક પગલું અત્યંત આવશ્યક અને આવકારદાયક છે.

આ લોકોને નોટીસ મોકલી જવાબ માંગ્યા