• કોઠારિયા વિસ્તારમાં 400 થી 500 બોટલ રક્ત એકત્રિત કરવાનો લક્ષ્યાંક
• પૂજ્ય મુકેશ ભુવાજી અને સેવક સમિતિ દ્વારા માનવતાવાદી આયોજન

સિટી ન્યૂઝ@રાજકોટ

આજના અત્યાધુનિક તબીબી યુગમાં અકસ્માત, ગંભીર બીમારીઓ કે સર્જરી જેવી મેડિકલ ઇમર્જન્સીના સમયે રક્તની માંગમાં સતત વધારો થઈ રહ્યો છે. આ જીવનરક્ષક જરૂરિયાતને પહોંચી વળવા અને અનેક જરૂરિયાતમંદ દર્દીઓને નવજીવન પ્રદાન કરવાના ઉમદા આશયથી રાજકોટના કોઠારિયા વિસ્તારમાં એક ભગીરથ રક્તદાન કેમ્પનું આયોજન કરવામાં આવ્યું છે. આ ઐતિહાસિક સેવાકાર્ય આચરના ગોગા મહારાજ પરિવાર (શિયોર - ચીનવુડ) અને સેવક સમિતિ દ્વારા પૂજ્ય મુકેશ ભુવાજીના સીધા માર્ગદર્શન અને પ્રેરણા હેઠળ યોજાવા જઈ રહ્યું છે, જે સમાજ માટે એક ઉત્તમ ઉદાહરણ પૂરું પાડશે. આયોજકો દ્વારા આ મેગા કેમ્પમાં અંદાજે ૪૦૦ થી ૫૦૦ બોટલ જેટલું રક્ત એકત્રિત કરવાનો વિશાળ લક્ષ્યાંક નિર્ધારિત કરવામાં આવ્યો છે, જે થેલેસેમિયા પીડિત બાળકો અને ગંભીર દર્દીઓ માટે આશીર્વાદરૂપ સાબિત થશે. અત્રે ખાસ ઉલ્લેખનીય છે કે પૂજ્ય મુકેશ ભુવાજી માત્ર આ રક્તદાન શિબિર પૂરતા સીમિત નથી, પરંતુ તેઓ નિરંતર ગૌસેવા, પર્યાવરણ જતન અને ભવ્ય મહાયજ્ઞ જેવા બહુવિધ લોક કલ્યાણના કાર્યોમાં પણ હંમેશા અગ્રેસર ભૂમિકા ભજવે છે. તેમના માર્ગદર્શન હેઠળ જ અમદાવાદના ગ્રીનવુડ સ્થિત ગોગા મહારાજના મંદિરે દર્શનાર્થીઓ માટે દર શનિ અને રવિવારે નિઃશુલ્ક ભોજન પ્રસાદની અવિરત વ્યવસ્થા ચલાવવામાં આવે છે, જે ભૂખ્યાને ભોજન આપવાની ભારતીય સંસ્કૃતિની પરંપરાને જીવંત રાખે છે. આ રક્તદાન શિબિર આગામી ૧૦ જૂન, ૨૦૨૬ ના રોજ સાંજે ૫:૦૦ વાગ્યાથી શરૂ થઈને રાત્રે ૧૨:૦૦ વાગ્યા સુધી કોઠારિયા મેઈન રોડ પર, બીલીપત્ર પાર્ટી પ્લોટની બાજુમાં આવેલા પિતૃકૃપા બિલ્ડિંગ મટીરીયલ સપ્લાયર્સ ખાતે યોજાશે. આ સમયગાળો ખાસ કરીને નોકરી કે વ્યવસાય કરતા લોકોની અનુકૂળતા ધ્યાનમાં રાખીને નક્કી કરાયો છે.

રક્તદાતાઓને આવવા-જવામાં કોઈ પણ પ્રકારની અગવડ ન પડે અને તેઓ સુરક્ષિત રીતે રક્તદાન કરી શકે તે હેતુથી સ્થળ પર લાવવા અને પરત મૂકવા જવાની ખાસ વાહન વ્યવસ્થા પણ આયોજકો દ્વારા કરવામાં આવી છે. આ પુણ્યકાર્યને ઐતિહાસિક સફળતા અપાવવા માટે સમગ્ર રાજકોટના સેવકો દિવસ-રાત ભારે જહેમત ઉઠાવીને પ્રચાર-પ્રસાર કરી રહ્યા છે. રક્તદાન શિબિર અંગેની કોઈપણ વધુ માહિતી મેળવવા અથવા વાહન સુવિધાનો લાભ લેવા ઇચ્છુક રક્તદાતાઓ હેલ્પલાઇન નંબર ૭૨૦૩૮૩૭૮૦૮ પર સીધો સંપર્ક કરી શકે છે. આયોજક પરિવાર દ્વારા રાજકોટના તમામ યુવાનો અને સેવાભાવી નાગરિકોને ભાવભીની અપીલ કરવામાં આવી છે કે તેઓ આ રક્તદાન કોઈના પરિવારની અમૂલ્ય ખુશીઓ પાછી લાવી શકે છે, તેથી માનવતાના આ મહા-અભિયાનમાં મોટી સંખ્યામાં જોડાઈને રક્તદાન રૂપી મહાદાન અવશ્ય કરો.