પૈસા અને એન્જોયમેન્ટના લાલચમાં સબંધોનો વેપાર

• પીડિતાએ કહ્યું કે છૂટાછેડા એટલે લીધા છે મારે અદલા-બદલીના દુષણમાં પડવું ન્હોતું

• સોશિયલ મીડિયામાં કપલ સ્વેપિંગનું ચાલે છે મોટું નેટવર્ક

• પરિણીતાનો મોટો દાવો પતિ-પત્ની અદલા-બદલીનું દુષણ તમામ શહેરોમાં ચાલે છે

સિટી ન્યૂઝ@રાજકોટ

ગુજરાતમાં છેલ્લા કેટલાક દિવસોથી ચર્ચામાં રહેલા કપલ સ્વેપિંગ મુદ્દે હવે રાજકોટની એક મહિલાએ પોતાની આપવીતી જાહેર કરી છે. મહિલાના જણાવ્યા અનુસાર, લગ્નજીવન શરૂ થયાના થોડા જ મહિનાઓમાં તેને એવી બાબતોનો સામનો કરવો પડ્યો હતો, જેના કારણે તેના વૈવાહિક જીવન પર ગંભીર અસર પડી હતી.

મહિલાએ દાવો કર્યો છે કે વર્ષ ૨૦૨૨માં તેના લગ્ન થયા બાદ શરૂઆતના ત્રણ મહિના સુધી બધું સામાન્ય હતું. પરંતુ ત્યારબાદ તેના પતિએ તેને કપલ સ્વેપિંગ અંગે માહિતી આપવાનું શરૂ કર્યું અને આ પ્રકારની પ્રવૃત્તિમાં જોડાવા માટે મનાવવાનો પ્રયાસ કર્યો હતો. મહિલાના કહેવા પ્રમાણે તેણે શરૂઆતથી જ આ બાબતનો વિરોધ કર્યો હતો અને તેમાં રસ ન હોવાનું સ્પષ્ટ જણાવ્યું હતું.

પીડિતાના આક્ષેપ મુજબ, ના પાડ્યા બાદ તેના પર માનસિક દબાણ લાવવામાં આવ્યું હતું. તેને સમજાવવામાં આવતું હતું કે આવી પ્રવૃત્તિમાં જોડાવાથી મનોરંજનની સાથે આર્થિક લાભ પણ મળી શકે છે. મહિલાએ વધુમાં દાવો કર્યો કે જો તે સંમત નહીં થાય તો પતિ અન્ય સંબંધો તરફ વળશે તેવી ધમકીઓ પણ આપવામાં આવતી હતી.

મહિલાના જણાવ્યા અનુસાર, સોશિયલ મીડિયા પ્લેટફોર્મ મારફતે અજાણ્યા કપલ સાથે સંપર્ક સાધવામાં આવતો હતો. શરૂઆતમાં ઓનલાઈન વાતચીત, ત્યારબાદ વીડિયો કોલ અને પછી રૂબરૂ મુલાકાતો યોજતી હોવાનું તેણીએ જણાવ્યું હતું. જોકે, આ તમામ દાવાઓની સ્વતંત્ર પુષ્ટિ થઈ શકી નથી.

મહિલાએ જણાવ્યું કે આ સમગ્ર ઘટનાક્રમ તેના છૂટાછેડાનું એક મુખ્ય કારણ બન્યો હતો. તેણે પોતાના પતિ તેમજ પરિવારના કેટલાક સભ્યો સામે વર્ષ ૨૦૨૩માં કાનૂની ફરિયાદ નોંધાવી હતી. ત્યારબાદ ઘરેલુ હિંસા સહિતના મુદ્દે કોર્ટમાં પણ અરજી કરવામાં આવી હોવાનું તેણે જણાવ્યું છે.

પીડિતાએ અન્ય મહિલાઓને પણ અપીલ કરી છે કે જો તેઓ કોઈ પ્રકારના દબાણ, શોષણ અથવા અનિચ્છનીય સંબંધો માટે મજબૂર કરવામાં આવતી હોય તો ખુલ્લેઆમ અવાજ ઉઠાવે અને કાનૂની મદદ લે.