સિટી ન્યૂઝ@રાજકોટ

રાજકોટ મહાનગરપાલિકામાં જાહેરખબરના હોર્ડિંગ્સના ટેન્ડરને લઈને ગંભીર ગોટાળાના આક્ષેપો સામે આવ્યા છે. શહેરમાં ટેન્ડર પ્રક્રિયા પારદર્શક હોવા બદલે "સેટિંગ"થી ચાલે છે એવી ચર્ચાએ જોર પકડ્યું છે. માહિતી મુજબ, મનપા દ્વારા જાહેરખબર હોર્ડિંગ્સ માટે ટેન્ડર પ્રક્રિયા શરૂ થવા જઈ રહી છે, પરંતુ કેટલીક એજન્સીઓએ આરોપ લગાવ્યો છે કે મંત્રા એડ એજન્સી સાથે અધિકારીઓની મીલીભગત ચાલી રહી છે. આક્ષેપ મુજબ, અન્ય એજન્સીઓના ટેન્ડર નાની ટેકનિકલ ભૂલ બતાવીને સીધા ડિસ્ક્વોલિફાય કરવામાં આવી રહ્યા છે, જ્યારે મંત્રા એડને ફાયદો પહોંચે તે રીતે પ્રક્રિયા આગળ ધપાવવામાં આવી રહી છે. વધુ ચોંકાવનારી વાત એ છે કે, બીજી એજન્સીઓના ભાવ વધારે હોવા છતાં તેમને તક આપવામાં આવી રહી નથી. ટેન્ડરની સ્પર્ધા ફોર્માલિટી બની ગઈ હોવાનો આરોપ લગાવવામાં આવી રહ્યો છે. ટેકનિકલ કારણોનો બહાનો બનાવી સ્પર્ધા જ ખતમ કરી દેવાનો પ્રયાસ ચાલી રહ્યો છે.

સ્થાનિક સૂત્રોનું કહેવું છે કે, "પહેલાથી જ કોણે કામ આપવાનું તે નક્કી થઈ ગયું છે, ટેન્ડર તો માત્ર દેખાવ માટે છે." રાજકોટ મહાનગરપાલિકા શહેરની ઈન્ફ્રાસ્ટ્રક્ચર અને નગરવ્યવસ્થાની મુખ્ય સંસ્થા છે, પરંતુ આવા આક્ષેપો તંત્રની વિશ્વસનીયતા પર સવાલ ઉભા કરે છે. નિષ્ણાતો કહે છે કે, જો ટેન્ડર પ્રક્રિયામાં પારદર્શિતા નહીં રાખવામાં આવે તો સરકારને આવકમાં નુકસાન, યોગ્ય સ્પર્ધા ખતમ, ભ્રષ્ટાચારને પ્રોત્સાહન મળે છે. આ મુદ્દે હજુ સુધી મનપાના ઉચ્ચ અધિકારીઓ તરફથી કોઈ સ્પષ્ટ જવાબ આવ્યો નથી, જે શંકાને વધુ ગાઢ બનાવે છે.

મુખ્ય સવાલો

• શું ટેન્ડર પહેલેથી જ ફિક્સ છે?

• શું ટેકનિકલ ભૂલો માત્ર બહાનો છે?

• શું મંત્રા એડને ફાયદો આપવા માટે રમત રમી રહી છે?

જો આ મુદ્દે તાત્કાલિક નિષ્પક્ષ તપાસ નહીં થાય, તો ડેવલપમેન્ટના દાવા વચ્ચે મનપાની વિશ્વસનીયતા પર મોટો પ્રશ્નચિહ્ન લાગી શકે છે