સિટી ન્યુઝ @ અમૃતસર

અમૃતસરના શ્રી ગુરુ રામદાસજી આંતરરાષ્ટ્રીય એરપોર્ટ પરથી હવાઈ મુસાફરો માટે એક અત્યંત મહત્વપૂર્ણ સુવિધાનો પ્રારંભ થયો છે. એર ઇન્ડિયાની નવી 'ઈઝી કનેક્ટ' હબ-એન્ડ-સ્પોક ફ્લાઇટ સેવા આજથી શરૂ કરવામાં આવી છે, જેનું ઉદ્ઘાટન કેન્દ્રીય નાગરિક ઉડ્ડયન મંત્રી કિન્જરાપુ રામમોહન નાયડુ દ્વારા વર્ચ્યુઅલી કરવામાં આવ્યું હતું. ભારત સરકારના નવા આંતરરાષ્ટ્રીય કનેક્ટિવિટી મોડેલ હેઠળ શરૂ થયેલી આ સેવાને કારણે પંજાબના મુસાફરો માટે અમેરિકા, કેનેડા, યુનાઇટેડ કિંગડમ (UK), યુરોપ અને ઓસ્ટ્રેલિયા સહિતના ૨૭ સ્થળો માટેની મુસાફરી અત્યંત સરળ બની જશે.

અગાઉ પંજાબના મુસાફરોએ અમૃતસરથી દિલ્હી જઈને ફરીથી ચેક-ઇન, ટર્મિનલ બદલવા અને ઇમિગ્રેશનની લાંબી પ્રક્રિયામાંથી પસાર થવું પડતું હતું, પરંતુ હવે આ નવી સેવાના કારણે દિલ્હીમાં ફરીથી આ પ્રક્રિયામાંથી પસાર થવું પડશે નહીં. મુસાફરો અમૃતસરથી જ સીધા પોતાના અંતિમ આંતરરાષ્ટ્રીય ગંતવ્ય સ્થાન સુધી ચેક-ઇન કરી શકશે અને દિલ્હીમાં સીધા આંતરરાષ્ટ્રીય ટ્રાન્ઝિટ દ્વારા આગળની ફ્લાઇટ પકડી શકશે. આ સેવા અંતર્ગત અમૃતસરથી દરરોજ બે ફ્લાઇટ્સ (સવારે ૯:૧૦ વાગ્યે અને રાત્રે ૧૦:૦૦ વાગ્યે) દિલ્હી માટે ઓપરેટ થશે, જ્યાંથી દિલ્હી પહોંચ્યાના ૪ કલાકની અંદર ઇન્ટરનેશનલ કનેક્શન મળી જશે.

બુકિંગ માટે મુસાફરો એર ઇન્ડિયાની વેબસાઇટ, મોબાઇલ એપ કે રજિસ્ટર્ડ ટ્રાવેલ એજન્ટોનો સહારો લઈ શકે છે, જ્યારે ભારતીય પાસપોર્ટ ધારકો માટે ડિઝીયાત્રામાં નોંધણી કરાવવી ફરજિયાત રાખવામાં આવી છે. સરકારના આ અભિગમથી વિદેશી ટ્રાન્ઝિટ હબ પરની નિર્ભરતા ઘટશે અને ભારત એક વૈશ્વિક એવિએશન હબ તરીકે મજબૂત બનશે.

એવિએશન ક્ષેત્રે ક્રાંતિકારી બદલાવ

આ પ્રકારની કનેક્ટિવિટી સેવાઓથી પ્રાદેશિક એરપોર્ટસનો વિકાસ થાય છે તેમજ આંતરરાષ્ટ્રીય સ્તરે મુસાફરી કરતા નાગરિકોનો કિંમતી સમય અને શ્રમ બચે છે.