સિટી ન્યુઝ @ ભાવનગર

હવામાન વિભાગ દ્વારા આગામી પાંચ દિવસ દરમિયાન રાજ્યમાં ભારે વરસાદની આગાહી કરવામાં આવી છે, જેના ભાગરૂપે આજે ભાવનગર જિલ્લામાં યેલો એલર્ટ જાહેર કરવામાં આવ્યું છે. જિલ્લામાં અમુક છૂટાછવાયા સ્થળોએ ભારે વરસાદની સંભાવના વ્યક્ત કરવામાં આવી છે. આજ સવારથી જ આકાશમાં ઘટાટોપ વાદળો છવાયેલા રહ્યા હતા અને ધીમીધારે વરસાદનું આગમન થતાં છેલ્લા કેટલાક દિવસોથી પડી રહેલી ઉકળાટ ભરેલી ગરમીમાંથી નાગરિકોને રાહત મળી છે.

આજે ભાવનગર ઉપરાંત અમરેલી, બોટાદ, સુરેન્દ્રનગર, અમદાવાદ, આણંદ, ભરૂચ, સુરત, મહેસાણા તથા બનાસકાંઠામાં પણ વરસાદ થવાની સંભાવના છે. છેલ્લા ત્રણ-ચાર દિવસથી માત્ર ઘનઘોર વાદળો છવાયેલા રહેતા હતા પરંતુ મેઘો વરસતો ન હતો, ત્યારે આજ સવારથી જ શહેરના સુભાષનગર, મહિલા કોલેજ, ઘોઘા સર્કલ, ઘોઘા જકાતનાકા, કાળાનાળા, રૂપાણી સર્કલ, વાઘાવાડી રોડ અને કળિયાબીડ સહિતના અનેક વિસ્તારોમાં ઝરમર વરસાદ વરસ્યો હતો.

ભાવનગર જિલ્લામાં સવારના ૬ થી ૧૦ વાગ્યા સુધીના ૪ કલાકના વરસાદના સત્તાવાર આંકડા મુજબ, વલ્લભીપુરમાં ૨૦ મિમી (પોણો ઈંચ), સિહોરમાં ૧૫ મિમી, ભાવનગરમાં ૧૪ મિમી, મહુવામાં ૧૩ મિમી, ઘોઘામાં ૭ મિમી, તળાજામાં ૨ મિમી, ગારીયાધાર, પાલીતાણા અને જેસરમાં ૧-૧ મિમી વરસાદ વરસી ગયો હતો. જિલ્લાના ૧૦ તાલુકાઓમાંથી ૯ તાલુકાઓમાં સામાન્ય વરસાદ નોંધાયો હતો, જ્યારે માત્ર ઉમરાળા તાલુકો જ કોરો રહ્યો હતો.

ભાવનગર જિલ્લામાં સવારના ૪ કલાકમાં વરસેલો વરસાદ

હવામાન વિભાગના યેલો એલર્ટ વચ્ચે ભાવનગર જિલ્લામાં સવારથી જ વરસાદી માહોલ જામ્યો છે. વલ્લભીપુરમાં પોણો ઈંચ અને સિહોર-ભાવનગર-મહુવામાં અડધો ઈંચ જેટલો વરસાદ વરસવાથી વાતાવરણમાં ઠંડક પ્રસરી છે. ઉમરાળા સિવાયના તમામ તાલુકાઓમાં મેઘરાજાએ હાજરી નોંધાવી છે.