સિટી ન્યુઝ @ ગાંધીનગર

ગાંધીનગર, ગાંધીનગર મહાનગરપાલિકાની આગામી ચૂંટણી પહેલા રાજ્ય ચૂંટણી આયોગ દ્વારા નવું રોટેશન જાહેર કરવામાં આવ્યું છે, જેના કારણે સ્થાનિક રાજકારણમાં ભારે ચર્ચા જાગી છે. ૨૭ ટકા ઓબીસી (OBC) અનામતના અમલ સાથે જાહેર કરાયેલા આ નવા રોટેશનથી મનપાના વર્તમાન કોર્પોરેટર અને પદાધિકારીઓનું ગણિત બગડી ગયું છે. અનેક દિગ્ગજ નેતાઓની ટિકિટ કપાઈ શકે છે અથવા તો તેમણે અન્ય વોર્ડમાં ચૂંટણી લડવા માટે નવો રસ્તો શોધવો પડશે. ગાંધીનગરની તમામ ૧૧ વોર્ડની ૪૪ બેઠકોનું નવું ચિત્ર સ્પષ્ટ થતાં જ ભાજપ અને કોંગ્રેસ બંને પક્ષોના કાર્યાલયોમાં દોડધામ મચી ગઈ છે.

નવા આદેશ મુજબ સૌથી મોટો ફટકો વોર્ડ નં. ૨, ૩, ૬, ૭ અને ૮ ના સામાન્ય કેટેગરીના નગરસેવકોને પડ્યો છે, જ્યાં અગાઉ સામાન્ય રહેલી બેઠકો હવે અનામત વર્ગમાં ફેરવાઈ ગઈ છે. નવા ગણિત અનુસાર કુલ ૪૪ બેઠકોમાંથી સામાજિક-શૈક્ષણિક પછાતવર્ગ (OBC) માટે ૧૨ બેઠકો (જેમાંથી ૬ મહિલાઓ માટે) ફાળવવામાં આવી છે. જ્યારે સામાન્ય અથવા બિનઅનામત કેટેગરીમાં ૨૬ બેઠકો છે જેમાં ૧૩ મહિલાઓ માટે અનામત છે. આ ઉપરાંત એસસી માટે ૫ અને એસટી માટે ૧ બેઠક ફાળવવામાં આવી છે. આમ, સમગ્ર બોર્ડમાં કુલ ૪૪ માંથી બરાબર ૫૦ ટકા એટલે કે ૨૨ બેઠકો મહિલાઓ માટે અનામત બનતા પક્ષોએ સક્ષમ મહિલા અને ઓબીસી ઉમેદવારોની શોધખોળ શરૂ કરી દીધી છે.

રાજકીય સમીકરણો અને અનામત

સ્થાનિક સ્વરાજ્યની ચૂંટણીઓમાં અનામતની જોગવાઈઓ અને રોટેશન પદ્ધતિથી સામાજિક પ્રતિનિધિત્વ સુનિશ્ચિત થાય છે, જે લોકશાહીને વધુ વ્યાપક બનાવે છે.