• SIT ની તપાસમાં મોટો ઘટસ્ફોટ, લાંચની રકમની વહેંચણી કરનાર ACB ના સકંજામાં
• 9 વર્ષમાં પગાર કરતા સવા ગણી વધુ આવક, કૌભાંડમાં ટકાવારીનું વિતરણ કરતો હતો આરોપી
• રેડ પડતા પહેલા વોટ્સએપ ચેટ ડિલીટ કરી હતી, તપાસમાં અનેક ચોંકાવનારા પુરાવા મળ્યા

સિટી ન્યુઝ @ સુરેન્દ્રનગર

સુરેન્દ્રનગર જમીન NA (Non-Agricultural) કૌભાંડમાં હવે કાયદાનો ગાળિયો વધુ મજબૂત બન્યો છે. પૂર્વ કલેક્ટરના PA તરીકે ફરજ બજાવતા જયરાજસિંહ ઝાલા સામે ACB એ 9 વર્ષમાં રૂ. 1.34 કરોડની અપ્રમાણસર મિલકતનો ગુનો નોંધ્યો છે. તપાસમાં બહાર આવ્યું છે કે, આરોપીએ પોતાના માસિક પગાર રૂ. 80,000 કરતા સવા ગણી વધુ રકમ ગેરકાયદે રીતે એકઠી કરી હતી. આ સમગ્ર કૌભાંડમાં જયરાજસિંહ ઝાલા લાંચની રકમ સાચવવા અને ટકાવારી પ્રમાણે તેનું વિતરણ કરવાનું કામ કરતો હોવાનું SIT ની તપાસમાં સ્પષ્ટ થયું છે.

કૌભાંડના સમયગાળા દરમિયાન કુલ 842 ફાઈલો મંજૂર કરવામાં આવી હતી, જેમાં પૂર્વ કલેક્ટરના કાર્યકાળમાં 501 ફાઈલો અને તેના અગાઉના માત્ર 3 મહિનામાં જ 341 ફાઈલો મંજૂર કરવામાં આવી હતી. ACB ના તપાસ અધિકારી પી.કે. પટેલે જણાવ્યું હતું કે, તપાસના ભાગરૂપે પોલીસની ટીમ આરોપીના લખતર સ્થિત નિવાસસ્થાને પણ પહોંચી હતી. રેડ પડતા પહેલા આરોપીએ નાયબ મામલતદાર ચંદ્રસિંહ મોરી સાથેની વોટ્સએપ ચેટ ડિલીટ કરી દીધી હોવાની વિગતો પણ તપાસ દરમિયાન મળી છે, જે તેના ગુનાહિત ઈરાદાઓને પુષ્ટિ આપે છે.

આ પ્રકરણમાં હવે અન્ય અધિકારીઓ સામે પણ અપ્રમાણસર મિલકતનો ગુનો નોંધાય તેવી પ્રબળ શક્યતાઓ સેવાઈ રહી છે. ED ની તપાસમાં પણ જયરાજસિંહ ઝાલા માત્ર એક કસ્ટોડિયન અને ડિસ્ટ્રીબ્યુટર તરીકે કાર્યરત હોવાનું સામે આવ્યું હતું. હાલ ACB દ્વારા તમામ પુરાવાઓની ખરાઈ કરવામાં આવી રહી છે અને આ ગંભીર કૌભાંડમાં સંડોવાયેલા અન્ય મળતિયાઓને પણ તપાસના દાયરામાં લાવવામાં આવશે.