સિટી ન્યુઝ @ નવી દિલ્હી

જમ્મુની એક સ્પેશિયલ NIA કોર્ટે લશ્કર-એ-તૈયબાનો કુખ્યાત ચીફ આતંકવાદી હાફિઝ મોહમ્મદ સઈદ વિરુદ્ધ નવું બિનજામીનપાત્ર વોરંટ જારી કર્યું છે. તેના પર કાશ્મીર ઘાટીમાં સક્રિય આતંકવાદીઓને હથિયારો, ભંડોળ અને આતંકી નિર્દેશો આપવાનો ગંભીર આરોપ છે. બે મહિનાથી પણ ઓછા સમયમાં જમ્મુ NIA કોર્ટ દ્વારા સઈદ વિરુદ્ધ જારી કરાયેલું આ બીજું બિનજામીનપાત્ર વોરંટ છે, જેને કાયદા મુજબ અમલ કરવા માટે NIA જમ્મુના DIGને મોકલવામાં આવ્યું છે.

આ વોરંટ જમ્મુ-કાશ્મીરમાં સક્રિય આતંકવાદીઓને હથિયારો અને અન્ય સહાય પહોંચાડવા સંબંધિત કેસની તપાસ દરમિયાન જારી કરાયું છે. અગાઉ જુલાઈમાં પણ કોર્ટે પહેલગામ આતંકવાદી હુમલાની તપાસના સંબંધમાં સઈદ વિરુદ્ધ વોરંટ જારી કર્યું હતું, જેમાં NIAએ તેને મુખ્ય માસ્ટરમાઇન્ડ ગણાવ્યો હતો. તપાસ એજન્સીના જણાવ્યા મુજબ સઈદ હાલ પાકિસ્તાનમાં છુપાયેલો છે અને કાયદાકીય પ્રક્રિયાથી બચવા માટે જાણી જોઈને ધરપકડ ટાળી રહ્યો છે.

આ સમગ્ર માસની શરૂઆત જમ્મુ-કાશ્મીર પોલીસ દ્વારા નાકા ચેકિંગ દરમિયાન એક શંકાસ્પદ આતંકવાદીની ધરપકડથી થઈ હતી, જેની પાસેથી ચાઈનીઝ ગ્રેનેડ અને જીવતા કારતૂસ મળી આવ્યા હતા. પૂછપરછ દરમિયાન તેની ઓળખ શ્રીનગરના મોહમ્મદ નકીબ ભટ તરીકે થઈ હતી, જેના આધારે કડક કાયદાકીય ધારાઓ હેઠળ ગુનો નોંધવામાં આવ્યો હતો. ઉલ્લેખનીય છે કે 1987માં પાકિસ્તાનમાં સ્થપાયેલા લશ્કર-એ-તૈયબાની કમાન અબ્દુલ્લાહ અઝ્ઝામના મૃત્યુ બાદ હાફિઝ સઈદે સંભાળી હતી અને ભારત વિરુદ્ધ સતત આતંકી પ્રવૃત્તિઓ ચલાવતો રહ્યો છે.

આંતરરાષ્ટ્રીય આતંકવાદ અને ન્યાયિક કાર્યવાહી

ભારતીય તપાસ એજન્સીઓ દ્વારા વૈશ્વિક આતંકવાદીઓ સામે લેવામાં આવી રહેલા કડક પગલાં દેશની સુરક્ષા અને કાયદાકીય શિસ્તને વધુ મજબૂત બનાવે છે. પાકિસ્તાનસ્થિત આતંકીઓ વિરુદ્ધ જારી થતા આવા વોરંટો આતંકવાદ સામેની લડાઈમાં કાનૂની શિકંજો કસવા માટે અત્યંત મહત્વપૂર્ણ સાબિત થાય છે.