સિટી ન્યુઝ @ રિયાદ

સાઉદી અરેબિયાએ ડ્રોન હુમલા બાદ પોતાની મહત્વપૂર્ણ ઈસ્ટ-વેસ્ટ તેલ પાઈપલાઈન અસ્થાયી રૂપે બંધ કરી દીધી છે. ગુરુવારે થયેલા આ ભીષણ ડ્રોન હુમલામાં પાઈપલાઈન સાથે જોડાયેલા પમ્પિંગ સ્ટેશનોમાં આગ લાગી ગઈ હતી અને કેટલાક લોકો ઘાયલ થયા હતા. ઈરાન યુદ્ધના કારણે હોર્મુઝ સ્ટ્રેટ બંધ થયા બાદ સાઉદી આ જ પાઈપલાઈન દ્વારા રોજ લગભગ 50 લાખ બેરલ તેલ પશ્ચિમી તટના યાનબુ બંદરગાહ સુધી મોકલી રહ્યું હતું, જેના કારણે વૈશ્વિક સ્તરે ઓઈલ સંકટ ઘેરાયું છે.

સાઉદી ઉર્જા મંત્રાલયે જણાવ્યું કે પાઈપલાઈન પર અનેક ડ્રોન હુમલા થયા હતા. સેટેલાઇટ તસવીરોમાં પમ્પિંગ સ્ટેશન પર આગ અને કાળો ધુમાડો નીકળતો સ્પષ્ટ જોવા મળ્યો છે. સાઉદી વિદેશ મંત્રાલયના દાવા મુજબ આ ડ્રોન ઈરાકથી આવ્યા હતા. જોકે, ઈરાકના વડાપ્રધાનના અનુરોધ પર સાઉદીએ હાલ પૂરતો વળતો હુમલો ન કરવાનો નિર્ણય લીધો છે અને ઈરાકને આ બાબતે કડક પગલાં લેવા જણાવ્યું છે. બીજી તરફ, ઈરાકી સરકારે પણ હુમલાની નિંદા કરી તપાસનું આશ્વાસન આપ્યું છે.

આ સંકટ વચ્ચે લાલ સમુદ્ર (રેડ સી) નો રસ્તો પણ બંધ થવાની અણી પર પહોંચી ગયો છે. યમનના હુતી વિદ્રોહીઓએ બાબ અલ-મંદેબ સ્ટ્રેટના વિસ્તાર પર કબજાનો દાવો કર્યો છે અને સાઉદી જહાજોને આ રસ્તેથી પસાર થવાની મંજૂરી નહીં આપવાની જાહેરાત કરી છે. બાબ અલ-મંદેબ એશિયા અને યુરોપ વચ્ચે તેલ અને માલસામાનની હેરફેર માટે અત્યંત મહત્વનો જળમાર્ગ છે, જેના પ્રભાવિત થવાથી આંતરરાષ્ટ્રીય બજારમાં ઉર્જા પુરવઠો ગંભીર જોખમમાં મુકાઈ ગયો છે.

વૈશ્વિક ઉર્જા બજાર પર અસર

મધ્ય પૂર્વમાં ચાલી રહેલા સૈન્ય તણાવ અને મહત્વપૂર્ણ ટ્રાન્ઝિટ રૂટ્સ પરના હુમલાઓએ વૈશ્વિક અર્થવ્યવસ્થા અને તેલ પુરવઠા સામે મોટો પડકાર ખડો કર્યો છે. પાઈપલાઈનો અને દરિયાઈ માર્ગો અવરોધાવાથી ઓઈલની કિંમતોમાં ઉછાળો આવવાની અને આંતરરાષ્ટ્રીય બજારો અસ્થિર થવાની પૂરી સંભાવના છે.