સિટી ન્યુઝ @ બેઇજિંગ : ચીનના પ્રમુખ શી જિનપિંગે ભ્રષ્ટાચાર વિરુદ્ધ પોતાની ઝુંબેશ તેજ કરતા દેશના બે પૂર્વ સંરક્ષણ મંત્રીઓ, વી ફેંઘે અને લી શાંગફૂને ગુરુવારે મોતની સજા ફટકારી છે. લશ્કરી કોર્ટે આ બંને દિગ્ગજ નેતાઓને લાંચ લેવા અને આપવાના કૌભાંડમાં દોષિત ઠેરવ્યા છે. નોંધનીય છે કે આ બંને નેતાઓએ જિનપિંગના સીધા માર્ગદર્શન હેઠળ કામ કર્યું હતું અને પોતે જિનપિંગે જ તેમની પસંદગી મહત્વના હોદ્દાઓ માટે કરી હતી.

વી ફેંઘે, જેઓ 2018 થી 2023 સુધી ચીનના સંરક્ષણ મંત્રી રહ્યા હતા, તેમણે પીપલ્સ લિબરેશન આર્મીના સૌથી શક્તિશાળી 'રોકેટ ફોર્સ' નું નેતૃત્વ કર્યું હતું. તેમના પછી લી શાંગફૂએ કાર્યભાર સંભાળ્યો હતો, પરંતુ 2024 માં બંનેને શાસક કમ્યુનિસ્ટ પાર્ટીમાંથી હાંકી કાઢવામાં આવ્યા હતા. લશ્કરી કોર્ટે લી શાંગફૂને લાંચ આપવા અને સ્વીકારવા એમ બંને ગુનામાં દોષિત ગણ્યા છે, જ્યારે વી ફેંઘેને મોટું લાંચ કાંડ આચરવા બદલ સજા સંભળાવી છે.

કોર્ટના આદેશ મુજબ, બંનેને બે વર્ષની રાહત (Reprieve) સાથે મોતની સજા ફટકારવામાં આવી છે. આ સાથે જ તેમને તમામ રાજકીય અધિકારોથી આજીવન વંચિત કરી દેવાયા છે અને તેમની તમામ ખાનગી સંપત્તિ જપ્ત કરી લેવામાં આવશે. ચીની કાયદા મુજબ, જો બે વર્ષનો સમયગાળો પૂર્ણ થયા બાદ તેમનું વર્તન યોગ્ય જણાશે તો તેમની સજા આજીવન કેદમાં ફેરવવામાં આવશે, પરંતુ તેમાં કોઈપણ પ્રકારના પેરોલ કે છૂટછાટની કોઈ શક્યતા રહેશે નહીં.

ચીન વિશ્વમાં સૌથી વધુ ફાંસીની સજા આપતા દેશોમાં મોખરે છે. આંતરરાષ્ટ્રીય સ્તરે ઉપલબ્ધ ડેટા મુજબ, ચીને 2002 માં અંદાજે 12,000 અને 2014-16 દરમિયાન પણ હજારો લોકોને ફાંસી આપી હોવાનો અંદાજ છે. જોકે, ચીન સરકાર સત્તાવાર રીતે ફાંસીની સજાના ચોક્કસ આંકડા ક્યારેય જાહેર કરતી નથી અને તેને રાજ્યના રહસ્ય (State Secret) તરીકે રાખવામાં આવે છે. સરકારી કર્મચારીઓને અપાતી ફાંસીની સંખ્યા હંમેશા રહસ્યમય રહેતી હોય છે.

આ ચુકાદાથી ચીની વહીવટીતંત્ર અને સેનામાં મોટો ફેરફાર જોવા મળી રહ્યો છે. શી જિનપિંગે સ્પષ્ટ સંદેશ આપ્યો છે કે ભ્રષ્ટાચારના મામલે કોઈને પણ છોડવામાં આવશે નહીં, પછી ભલે તે તેમના કેટલાય નજીકના કેમ ન હોય. રક્ષામંત્રી જેવા સંવેદનશીલ પદ પર રહેલા વ્યક્તિઓને મોતની સજા મળવાથી ચીનની લશ્કરી શક્તિ અને આંતરિક શિસ્ત પર પણ સવાલો ઉભા થયા છે. આગામી દિવસોમાં વધુ કેટલાક ઉચ્ચ અધિકારીઓ પર પણ ગાજ પડી શકે છે.