સિટી ન્યુઝ @ મોરબી : મોરબીના વનાળીયા ગામે કૌટુંબિક સંબંધોને શર્મસાર કરતી એક અત્યંત કરુણ ઘટના સામે આવી છે. ઘર પાસે નશાની હાલતમાં ગાળો બોલતા કૌટુંબિક કાકાને અટકાવવા ગયેલા 28 વર્ષીય ભત્રીજાની છરીના ઘા ઝીંકી હત્યા કરવામાં આવી છે. આ બનાવથી ગામમાં ભારે અરેરાટી વ્યાપી ગઈ છે અને પોલીસે આરોપીની અટકાયત કરી વધુ તપાસ હાથ ધરી છે.

પ્રાપ્ત વિગતો અનુસાર, વનાળીયા ગામે રહેતા મહેશભાઈ ગોરધનભાઈ રાઠોડ (ઉં.વ. ૨૮) ગત રાત્રિના આઠેક વાગ્યાના અરસામાં પોતાના ઘર પાસે હાજર હતા. તે સમયે તેમના કૌટુંબિક કાકા સુરેશભાઈ કાનજીભાઈ રાઠોડ નશાની હાલતમાં ત્યાં આવી જાહેરમાં ગાળો બોલી રહ્યા હતા. મહેશભાઈએ તેમને ટોકતા અને ગાળો બોલવાની મનાઈ કરતા બંને વચ્ચે ઉગ્ર બોલાચાલી થઈ હતી, જે જોતજોતામાં ઝપાઝપીમાં પરિણમી હતી.

આ બોલાચાલીથી ઉશ્કેરાયેલા સુરેશભાઈ તુરંત પોતાના ઘરમાંથી છરી લઈને બહાર આવ્યા હતા અને મહેશભાઈ પર તૂટી પડ્યા હતા. તેમણે મહેશભાઈના પેટ અને કમરના ભાગે છરીના આડેધડ ઘા ઝીંકી દીધા હતા. લોહીલુહાણ હાલતમાં મહેશભાઈને તાત્કાલિક સારવાર માટે પ્રથમ મોરબી અને ત્યારબાદ વધુ સારવાર અર્થે રાજકોટ હોસ્પિટલ ખસેડવામાં આવ્યા હતા. જોકે, રાજકોટ ખાતે સારવાર દરમિયાન મહેશભાઈએ દમ તોડી દીધો હતો.

આ ઘટના અંગે મોરબી તાલુકા પોલીસ સ્ટેશનમાં જાણ કરવામાં આવતા પોલીસ કાફલો ઘટનાસ્થળે દોડી ગયો હતો. પોલીસ કર્મચારી ગિરીશભાઈ મારૂણીયાના જણાવ્યા અનુસાર, આરોપી સુરેશ રાઠોડને પોલીસ દ્વારા રાઉન્ડ અપ કરી લેવામાં આવ્યો છે અને તેની વિરુદ્ધ હત્યાનો ગુનો નોંધવાની તજવીજ હાથ ધરવામાં આવી છે. સામાન્ય બાબતમાં થયેલી આ હત્યાને કારણે મૃતકના પરિવારમાં માતમ છવાઈ ગયો છે.