બાળકોની ઓનલાઇન સુરક્ષા અને માનસિક સ્વાસ્થ્ય ઉપર ખતરો ઉભો થઈ રહ્યો છે

સિટી ન્યૂઝ@રાજકોટ

વડાપ્રધાન નરેન્દ્ર મોદીએ તાજેતરમાં ઓસ્ટ્રેલિયાના ૧૬ વર્ષથી ઓછી ઉંમરના બાળકો માટે સોશિયલ મીડિયા પર પ્રતિબંધ મૂકવાના નિર્ણયની પ્રશંસા કર્યા બાદ ગુજરાત સરકારે પણ રાજ્યના શાળાકીય વિદ્યાર્થીઓ માટે સોશિયલ મીડિયા અને આર્ટિફિશિયલ ઇન્ટેલિજન્સ (એઆઈ)ના ઉપયોગને નિયમિત કરવા માટે માર્ગદર્શિકા તૈયાર કરવાની પ્રક્રિયા શરૂ કરી છે. ૧૬ વર્ષથી ઓછી ઉંમરના વિદ્યાર્થીઓમાં વધતા સ્ક્રીન ટાઈમ, સોશિયલ મીડિયાના વધુ ઉપયોગ અને એઆઈ પર વધતી નિર્ભરતા બાળકોના માનસિક વિકાસ, વિચારશક્તિ અને સ્વતંત્ર રીતે સમસ્યા ઉકેલ લાવવાની ક્ષમતા પર નકારાત્મક અસર કરી રહી છે. આ મુદ્દાઓને ધ્યાનમાં રાખીને રાજ્ય સરકાર સંભવિત નિયમ માટે વિવિધ વિકલ્પો પર વિચાર કરી રહી છે. બેઠક દરમિયાન વડાપ્રધાન મોદીએ ઓસ્ટ્રેલિયાના માહિતી ટેકનોલોજી અને સોશિયલ મીડિયા સંબંધિત કાયદાકીય સુધારાઓને વિશ્વ માટે પ્રેરણાદાયી ગણાવ્યા હતા. તેમણે જણાવ્યું હતું કે ભારત પણ આ પ્રકારના પગલાંમાંથી ઘણું શીખી રહ્યું છે.