• વહેલી સવારે માત્ર બે કલાકમાં બે ઇંચ વરસાદ ખાબકતા નીચાણવાળા વિસ્તારો પ્રભાવિત થયા છે.

• કલેક્ટર અનિલ ધામેલિયા દ્વારા કલમ-૧૬૩ હેઠળ જાહેરનામું બહાર પાડીને રજા જાહેર કરાઈ છે.

• નોકરી ધંધે જતા લોકોને ભારે હાલાકી વેઠવાનો વારો આવ્યો હોવાનું સામે આવ્યું છે.

સિટી ન્યુઝ @ વડોદરા

વડોદરા, હવામાન વિભાગની આગાહી મુજબ રાજ્યમાં ભારેથી અતિભારે વરસાદની શક્યતાઓ વચ્ચે વડોદરા શહેરમાં આજે ૩૧ જુલાઈએ વહેલી સવારથી જ વરસાદ વરસી રહ્યો છે. સવારે છ થી આઠ વાગ્યા સુધીમાં બે ઇંચ વરસાદ પડવાથી નીચાણવાળા વિસ્તારોમાં પાણી ભરાઈ ગયા છે. આ આગાહીના પગલે તંત્ર દ્વારા શાળાઓ અને કોલેજોમાં રજા જાહેર કરવામાં આવી છે, જેથી વિદ્યાર્થીઓને રાહત મળી છે, પરંતુ નોકરી ધંધે જતા લોકોને ભારે હાલાકી વેઠવાનો વારો આવ્યો છે. અલકાપુરી સ્ટેશન પાસે આવેલા ગરનાળામાં પાણી ભરાઈ જવાના કારણે કેટલાક વાહનો પણ બંધ પડી ગયા હતા.

ભારતીય હવામાન વિભાગ દ્વારા વડોદરા જિલ્લામાં અતિ ભારે વરસાદ અને રેડ એલર્ટની આગાહી કરવામાં આવી છે, જેને ધ્યાનમાં રાખીને જિલ્લા કલેક્ટર અને જિલ્લા મેજિસ્ટ્રેટ અનિલ ધામેલિયાએ ભારતીય નાગરિક સુરક્ષા સંહિતા-૨૦૨૩ની કલમ-૧૬૩ હેઠળ જાહેરનામું બહાર પાડ્યું છે. આ જાહેરનામા મુજબ આવતીકાલે ૧ ઓગસ્ટના રોજ વડોદરા જિલ્લાની તમામ આંગણવાડીઓ, શાળાઓ, આઈ.ટી.આઈ. તેમજ કોલેજોમાં શૈક્ષણિક કાર્ય સંપૂર્ણપણે બંધ રહેશે. વિદ્યાર્થીઓની સુરક્ષા અને જાનમાલની સલામતીને પ્રાથમિકતા આપીને આ નિર્ણય લેવામાં આવ્યો છે અને આદેશનું ઉલ્લંઘન કરનાર સામે કાયદેસરની કાર્યવાહી કરાશે.

વરસાદના આગમનથી અસહ્ય ગરમી અને બફારાથી ત્રસ્ત વડોદરાવાસીઓને રાહત મળી છે, પરંતુ વહેલી સવારે વરસાદ વચ્ચે કેટલાક વિસ્તારોમાં વીજળી ગુલ થઈ જવાના અહેવાલો પણ સામે આવ્યા છે. રાવપુરા, ફતેગંજ, આજવા રોડ, વાઘોડિયા રોડ, કારેલીબાગ, સુભાનપુરા, સયાજીગંજ, પાણીગેટ, માંડવી, હરણી, માંજલપુર અને સમા તથા ભાયલી સહિતના મોટાભાગના વિસ્તારોમાં વરસાદ વરસી રહ્યો છે. વડોદરાના આસપાસના તાલુકાઓમાં પણ સારો એવો વરસાદ નોંધાયો છે, જેનાથી જળસંચયની સ્થિતિ સુધરવાની આશા છે.

તંત્ર દ્વારા નાગરિકોને અપીલ કરવામાં આવી છે કે તેઓ અગમચેતીના ભાગરૂપે જરૂરી કામ સિવાય ઘરની બહાર ન નીકળે. હાલમાં વરસાદનું જોર થોડું ઘટ્યું છે છતાં હવામાન વિભાગની આગાહી મુજબ આગામી સમયમાં વરસાદ વધુ પડે તેવી શક્યતા છે. વહીવટી તંત્ર દ્વારા કોઈપણ આકસ્મિક પરિસ્થિતિને પહોંચી વળવા માટે પૂરતી તૈયારીઓ કરી લેવામાં આવી છે અને રાહત-બચાવ ટીમોને પણ એલર્ટ રાખવામાં આવી છે.

શહેરમાં વરસાદી પાણીના નિકાલ માટે મ્યુનિસિપલ કોર્પોરેશનની ટીમો કામે લાગી ગઈ છે જેથી ટ્રાફિક વ્યવહાર પૂર્વવત થઈ શકે. નાગરિકોએ પણ તંત્રની સૂચનાઓનું પાલન કરીને સુરક્ષિત રહેવું અત્યંત આવશ્યક છે. આગામી કલાકોમાં હવામાનની સ્થિતિ પર સતત નજર રાખવામાં આવી રહી છે.